下課十分鐘（下）
【文、圖／張捷明／國立中央大學客家語文暨社會科學學系在職專班碩士】
豬妹妹企等毋敢停動，驚虫憲公跌下來，還當驚心个吩咐虫憲公講：「愛細義哦！跌下來時毋係搞哦！」虫憲公應講：「你還貼吾心肝哦！恁仔細！亻厓知。」豬妹妹又問講：「等下亻恩愛搞麼个好呢？」虫憲公應講：「亻恩來去搞翹翹板好無？」豬妹妹講：「好啊！好啊！」虫憲公接等就開始唱起翹翹板个山歌啊來：「一儕一片翹啊翹，有高有低有歡笑；看近看遠輪等來，兩儕平重好扌帣頭。」豬妹妹聽著這，想想毋著，佢摎虫憲公个身胚仔爭差恁～多，佢接等就唱：「亻厓恁大箍你恁瘦，頭重尾輕難扌帣頭，係愛同亻厓共下搞，等亻厓減肥正相招。」虫憲公知佢無自信，就唱轉去安慰佢講：「毋使道嘆毋使愁，等亻厓喊人湊共頭，蛇哥𧊅仔並老鼠，包你搞到毋肯走。」
豬妹妹還係毋放心，又唱：「四儕湊等有幾重，亻厓一坐落難停動，毋當你就湊別儕，亻厓掃地泥準運動。」
虫憲公嘴唱山歌，手腳毋敢有半下停跎，佢歸身仔出力跋一路上，聽著豬妹妹還毋放心，就出計講：「該亻厓喊水牛大哥湊共頭？」豬妹妹講：「亻厓正三百斤重，水牛大哥千二斤重，到時續來換亻厓翹高高，毋得下來口也。」豬妹妹个數學異好，虫憲公个頭腦也不差，跈等又講：「河馬大哥千五斤重，換牛大哥同你共頭，河馬大哥摎亻厓兜共下，恁仰毋就爭七毋爭八，差毋多堵堵好口也。」豬妹妹講：「係喲！係喲！亻厓仰無想著呢，毋過……。」豬妹妹心肝肚愐加一下，還係試著無妥當，佢講：「平重係平重口也，毋過，就毋知翹翹板承得贏三千斤無？」虫憲公也愐一下講：「著喔呵！唉！莫管佢了啦，去到運動坪正搞別項啦！」講煞又煞煞跋等上，佢目珠既經看著豬背囊口也，盡歡喜个蹶加一步腳跋啊上豬背囊，氣哩呼嚕氣急急講：「來去喲！」上課鐘就響吔。
虫憲公拿起吊到頸根項个時錶仔一看，原來佢既經用忒九分又九秒。無奈何，佢又遽遽將豬尾準溜滑梯溜一路下來，好得正用忒九秒鐘。虫憲公蹶到一身汗，毋過豬妹妹還係無運動著。
大家又行等入教室。老鼠仔打第一，佢講：「豬妹妹你兩儕還遽喔！比亻厓還較緊手轉到教室。」虫憲公聽著當敗勢。
第二遽个係牛仔，第三遽个係老虎，第四遽个係兔仔，盡包尾个又係該兩隻盡好搞个搞潭精：猴仔合狗仔，兩儕又尖到門口相賽講：「亻厓先！」「亻厓先！」毋肯相讓。
又聽著教室肚「oˇˇi…」一聲大大聲，這兩儕正乖乖仔一儕一片，行轉自家个位仔上坐好。
先生跈等行入教室，又上課吔。
