日頭下
【圖／李岳哲；文／邱一帆／國立中央大學客家語文暨社會科學學系客家研究博士班】
發音人：邱一帆（四縣腔）
這係臨暗愛落山个日頭，兩片个大樹歸身樹葉榮榮，堵好同日頭夾在蒂中央，光線就恁樣射啊過來。溫柔个光線，對樹縫、葉縫染一路過來，遠位个潭面瀲光、就近个地面打光。這位定著係分人行尞个公園。圓形个凳仔，圍等一頭一頭个大樹，該係當適合分人坐尞个地方，不管日頭對哪位箭過來，總有一角做得尞涼。
一對公婆就在鏡頭前。長長个人影，看得出著裙个人離鏡頭較近，著褲个揇等細人仔个人離鏡頭較遠。看腳步行動，做餔娘个人，行向做老公个，當像愛𢯭手揇細人仔个樣仔；做老公个乜行向做餔娘个，當像愛同細人仔交分餔娘揇。佢兜身項个長袖衫，走漏出寒天个氣息，這日應該係假日，難得有恁溫馴个日光瀉出來，燒暖一屋下人！
恁好个天時，一屋下人在這潭脣个公園行尞，仰般鬆爽、仰般自然！脣項，一輛自行車，同𠊎載轉自家个童年，該央時，做阿爸阿姆个哪有恁多米國時間，帶自家个細人仔出去行尞。童年个𠊎，一到放尞日，會同上下年紀个隔壁鄰舍、無就孤孤一儕，在田項、河壩、山林肚野上野下。
田項个青漂仔、湖鰍仔𠊎識撈過、抓過；田螺、𧊅仔𠊎乜識扡過、釣過；同禾仔相爭个稗仔𠊎識挷過、禾串𠊎也識拈過；還有禾穀收成過个禾稈，𠊎乜識紮過、㧡過……。 日頭下，童年个𠊎，在田項、河壩、山林留下當多生趣个、冒險个、快樂个回憶。
