推薦《百年客諺客英解讀》
【文、圖／鍾榮富／南臺科技大學應用英語系講座教授】
發音人：鍾榮富（四縣腔)
盡早就聽講彭欽清教授想愛整理MacIver 1926版《客英大辭典》底背个材料，但係過了兩三年，只有「聽著響雷公，無看著天落雨」，想講彭教授做人熱心，又加上樣樣都通，可能無閒整理這百年大事。無想著，最近接著彭教授个電話，講佢同黃菊芳教授共同合作个《百年客諺客英解讀》即將愛出版，喊𠊎提(同佢)寫序。接著初稿係暗哺，馬上讀到半夜，毋盼得放下來。
這本書个內容毋單只詳細列出《客英大辭典》个諺語，還經過精心个校對，指出原書个可能問題，使得看出兩位作者投入个時間同心血精神。同時，對每一條諺語，都重新注音，改用現代常用詞典的用字，前後个安排也透過辭典順序重新訂定，方便讀者翻讀。最可貴个所在係，這本書个諺語，都參考現下已經出版个相關諺語專書，比對參照，不單可以看出同一句諺語在各个地方或者各个時間點，採用个表達方法無共樣。也可以看出，客家先民在歷史上幾下擺遷徙過程當中，透過客話个通用，保存了共同个先賢智慧結晶。換句話講，這本書提出了客家各種諺語最可能个解釋，還原客話頭擺个底蘊。這都係可以看出兩位作者用心挖掘經典古書个功夫。
客家諺語反映客家先賢早期生活个經驗智慧，頭頭擺無麼个機械，也無麼个電動工具，先輩就恁仔辛勤工作，日起出門，月落歸屋，心中難免有盡多感慨，有人毋識耕種，生活無憂無慮，食好著好。有人千辛萬苦，早出夜歸，掀開米缸，還係無罅三餐食著。人个命，同山水花樹共樣，會出水个所在，自然有雜樹野花，無水無泥个地方，乜本本看得著耐旱个樹種迎風飄揚。在這種情形之下，先賢了解著「人生不完美，熱天少眠帳，寒天少領被」，也會自我解嘲，「窮人無麼个好，但得三餐早」，故所做麼个都愛樂觀，「命中無一百，奈何求一千？」認命知足，正係為人生存之道。
個人看了這本書，有兩點感想，愛在這同大家分享。第一，這本書工程浩大。舊辭典往往透過照相翻印，版型毋大，字體又細，作者愛歸日耗啊在各條諺語个比對、校勘、同現代版有麼个差別，堵著客話同英文个解釋有增差，還愛去翻查英文字典，前後比較，實在無兩三年功夫無辦法完成。淨有戇牯正會去做這種事頭。客家學者中，最毋缺个，就係戇牯。第二，既然有人做戇牯，下了恁多精神，𠊎兜現下人毋使忒精，有機會定著愛尋一本來看，正知得客家先人有麼个生活智慧。也正知得這兩位作者有幾戇。
