轉屋下
【文／陳芯慧／國立中央大學客家語文碩士班】
發音人：陳芯慧（四縣腔）
記得𠊎細細个時節，逐擺在火車頭看著鬧熱煎煎个人，心肝肚都會特別歡喜，恅著 大家都係愛出去外背尞，當鬧熱个樣仔。後來，漸漸仔大了，再過看等火車頭淰淰个人，知著大家都係離鄉背井去外背做事，顛倒試著一息仔酸酸澀澀，心性加盡多愁了。𠊎自家在該愐想：「啊！這可能就係長大个滋味啊！」。
回想著正開始讀大學个時節，𠊎從故鄉桃園走到台中去讀書，𠊎印象當深，該央時，去台中个第一隻禮拜搣到無閒洎杈 ，過加上還吂慣習新个環境，𠊎歸隻人幾暗晡都食睡毋得，食乜食毋慣，睡乜睡毋落覺，歸日都殗殗个。好得尞日當遽就到了，𠊎包袱儘採款款好勢，礱礱舂舂歸路拚啊下，煞煞就坐火車轉去桃園个屋下。到巷口个時，天時已經當暗了，歸條路烏疏疏無麼个光，單淨幾隻路燈企在旁脣，像衛兵守衛共樣。該時隔壁鄰舍全部都關火睡目了，𠊎行到門脣口，摸等門，看等屋下裡背光光个燈火，𠊎知，係阿姆在廳下等𠊎轉。
一開門，阿姆麼个都無講，單淨從電鑊兜一碗麵線分𠊎，喊𠊎遽遽趕燒啊食。該碗麵當清、當簡單，就係麵線加卵，還過摻一息仔瘦肉，頂背過加紅蔥頭，看起來無麼特別，毋過食等食等，𠊎个目汁緊跌，包尾，歸碗麵緊食緊鹹。阿姆當緊張，緊問𠊎到底係仰般？係毋係學校發生麼个事情？還係受著麼个委屈？𠊎頭犁犁仔，無講一句話，阿姆乜無繼續問下去，𠊎想，這就係阿姆个愛，係佢關心𠊎个方式。毋過𠊎想阿姆應該知，其實𠊎單淨係想屋下定定。
後來讀書讀幾年，逐擺轉屋下阿姆都還係會在廳下開等一盞火等𠊎落去，再過準備一碗麵分𠊎食，四、五年來都係恁樣，阿姆个愛從來都毋曾消退。對𠊎來講，轉屋下係一種慣習，看著屋下个燈火會分𠊎有心安个感覺，還過該碗麵就係一種記憶，裡肚裝等感情摎溫度，摎𠊎个心䌈緪緪。
