腳魚仔先生
【文／謝鎧任／國立中央大學客家語文碩士班】
發音人：謝鎧任（四縣腔）
日頭慢慢仔跋上山頂，一打早，阿爸已經愛去魚塘仔做事吔，阿姆喊：「遽遽䟘床吔，還在發夢咩?」目眨眨个𠊎等，毋甘願離開眠床，定著愛燜一下飯乾正愛跋䟘起來。等大家都食核朝，阿哥騎等腳踏車載等𠊎愛出發去𢯭手阿爸做事。一到魚塘仔，𠊎等愛拿面盆去承挖好个腳魚仔卵。接下來，三个細孲路仔就跈等阿姆，去到前一日暗晡腳魚仔孵卵个所在，係阿爸用紅毛泥同磚頭起个屋仔，裡背有蓋多濕潤个沙仔，為著愛分腳魚仔在這做得安心个生卵。
阿姆特別交代𠊎講：「愛注意哦！手伸入去沙仔肚項个時節愛定定仔弓起來，毋好伸長長，恁樣手指甲正毋會同卵刺壞哦！」過無半點鐘，阿哥佇毋著緊挖卵都無休息，就同阿姆講：「阿姆，𠊎做得去一下便所無?」阿姆答應以後，阿哥就恬恬仔行到𠊎脣口講：「老弟，愛來比賽一下無？看麼人做得最先同面盆放淰。」𠊎應：「好啊，𠊎正毋會輸分你。」兩个戇山狗仔就恁樣比賽起來吔，過一下吔，𠊎就聽著阿哥該片傳來盡大个聲音，「啊!」原來係阿哥無企好，橫下去魚塘仔裡肚吔，𠊎就企在魚塘仔脣口看等阿哥緊看緊㖸。阿姆聽著恁大个聲音就遽遽行過來，問講：「仰仔啊？喊麼个啊？」阿哥面紅濟炸仔講：「無啦，係𠊎無注意橫下來吔。」阿姆面一變，發譴到一句話都無講。𠊎就遽遽走去田脣口拈吔一隻長棍子愛分阿哥扼等，恁樣佢過好對底下跋上去。
𠊎等看著阿姆已經膦火著仔，就鼻公摸摸仔，共快去同事頭做核，阿爸看著𠊎等个面色都怪怪，盡像有發生麼个事情，就喊𠊎等先歸去屋下休息。一到屋下，阿姆先敨吔一口氣，就喊阿哥過去，阿姆講：「腳伸出來，𠊎同你搽藥仔。」阿哥正畏羞仔伸腳出來。原來佢頭先橫下去个時節就著傷吔，佢毋想分阿姆看著，因為驚怕阿姆又發譴，嗄毋知阿姆早就影著吔。
阿姆溫柔个對等阿哥講：「腳包好咧，準備食晝吔！」。看著大家和樂个形仔。這就係𠊎最好看著个樣仔。做核事以後，集揫起來享受當晝个休息時間，這已經變做心肝肚最深个回憶，下擺仔愐起來，還會偷㖸。
