番薯嫲
【文／羅雅玲／國立中央大學客家語文碩士班】
發音人：羅雅玲（四縣腔）
細个時節，大人總會摎嬰兒仔安乳名，這兜乳名帶有含意，愛好記也愛方便喊。𠊎有一个乳名安到「番薯嫲」，係阿太摎𠊎安个，這乳名在𠊎知事後，就無喊了！
𠊎一出世，生到肥肥胖胖，當像番薯，逐擺想著「番薯嫲」，連帶想著一儕人——吾阿太。公太過身較早，𠊎同老弟老妺、叔伯老弟老妹簡稱婆太為「阿太」。阿太總係梳等一頭客家婦女个髻鬃 ，可能係驚冷，當少看著佢著短袖衫，厥衫當多花灰色，無就係淺淺个柑仔色。阿太逐日朝晨天吂光就䟘床了，食飯時會固定坐在飯桌个斜對面，食飽還會再啉一杯當燒个滾水，動作非常慢，行路會帶等拐杖，發出「咚！咚！咚！」个聲，聲音盡像有人在敲門。
阿太洗身有隻習慣，毋會鎖門，會同枴杖靠在外背門項，𠊎同叔伯老弟逐擺放學轉到屋下，堵好係阿太个洗身時間，𠊎兜會恬恬仔行去舞射佢，挑事𢱤門，無就故意同電火扚忒，輒常摎阿太搣到當譴，屋家肚細人仔多，佢毋知到底係麼人在搞怪，故所佢都會大聲喊「哪隻高毛仔！等下就知死哩……」，阿太罵起人來係當得人驚个，佢身洗好，又像無事共樣，佢知𠊎兜係一群好搞个細鬼仔，毋會同𠊎兜計較。
「番薯嫲」這稱呼，全家人都知，但係唯有阿太會恁樣喊𠊎，戴在隔壁个阿姑總講「『若太逐擺都會喊番薯嫲來啊！』無就係『番薯仔！番薯仔！』緊喊，起勢毋知係喊麼儕，後來正知係喊厥息嫲仔啦！」，阿婆也同𠊎講「你正愛學行路時，會坐在蝲䗁車項，阿太會恬恬仔坐在竹椅項緊看，看到睡忒！」，𠊎有一隻枕頭同阿太墊睡个枕頭共款，還細時𠊎一定愛有這隻枕頭，正做得入睡，到這下𠊎還留等，大欸正知，原來𠊎摎阿太之間有當多共同个回憶。
阿太在十四年前離開人世，看吔以前細時同阿太共下翕个相片，佢總係笑瞇瞇仔揇等𠊎，對𠊎來講「番薯嫲」毋單淨係乳名，還有阿太對𠊎个惜愛。
