㜮合惡，毋壁合壞癖
【文、圖／彭欽清／國立政治大學退休教授】
發音人：彭欽清（四縣腔）
讀初中該下，逐年都有全縣性个時事測驗比賽。學校為著愛爭取好成績，比賽前一禮拜，音樂、畫圖、體育這兜課都暫時停忒，分學生仔自家自習，有問題做得請教先生。
有一日，𠊎讀學校發个補充資料，有兜毋係盡了解，就擎手請問先生。先生解釋到毋係盡清楚，就請佢做得講較詳細兜仔無？毋知係當時自家个話講來毋適當抑麼个，先生玄玄風開聲大罵，續等就抨𠊎幾下下巴掌嫲，𠊎仆在書桌項，佢還係在吾背囊項連捶至捶，全班同學都嚇到呆忒。下課後，同學都講𠊎莫去問到柄來擎就好仔，因為先生正在小學轉過來，有兜問題佢怕毋係已知，𠊎請佢講詳細兜仔，佢可能話著𠊎挑試愛考佢，故所正會發狂。
轉到屋下，吾姆看著吾面項个巴掌嫲印，就問𠊎原由，𠊎頭尾同佢講，佢講𠊎自家好个，莫問就好誒。毋過，看著滿子分先生打到恁仔，還係忍毋核个講：「做人麼个先生！㜮合惡，毋壁合壞癖。」還教𠊎，下二擺係做先生，定著毋好恁樣。該年个時事測驗，𠊎成績優等，得著縣長獎。
苗栗縣立大湖國中時事測驗縣長獎獎狀影本
大學畢業，預官退伍，𠊎轉去初中教一年書，同這個先生變到同事。佢專業个科目盡慶，毋過對學生仔个管教方式一直有問題，動啊著就同學生喊到辦公室，毋係罵就係打，有个學生仔就當惱佢。已多年長个先生都勸佢愛改，佢又有厥講法。有一擺有學生仔在樓頂个廊仔項大聲喊佢這兜同佢安个名仔，佢就氣浡浡仔逐等上去愛尋學生仔出水，訓導主任緊拂頭講：「毋壁合硬殼。」
其實，古今中外，無論「濫合惡， 毋壁合壞癖 」抑係「毋壁合硬殼」个人毋會少，尤其係政治人物。另外一句老古言語「濫合惡，賁皮合硬殼」，講到還較實在。人講个「敢大聲就贏人」，已多大粒个官動啊著就大聲發譴，惡豺豺仔，明知做毋著還係愛硬詏，別人个話全聽毋入耳，做來較㜮狗屎佢乜穩穩做厥大官。
上樑不正下參差，領導个人都這種樣相，社會毋亂也已難。
