男拜香山 女打血盆
【文／何石松】
發音人 何石松—海陸腔
男拜香山，女打血盆，係一首充滿微言大義，孝子用心，溫柔敦厚介諺語。表面係講妙善公主捨己救父介偉大，目連救母介堅忍，所以愛拜香山、打血盆。實際上，係孝子心中一種不可言說介艱苦，佢兜愁勞著爺哀單人獨馬，行到陰風慘慘介黃泉路上，愛仰般渡過該前有牛頭馬面介呵咄，後有惡狗猛虎介威脅，還有該十殿閻王介把守審理，目瞋瞋介凶神惡煞，看著都得人驚，愛仰般正好？
所以，懿德善行介孝子，在爺哀人老過身之後，愛用尊親介名義，來做齋、做功德，一種謙虛知差介心情，改過自新介態度，拜託觀音娘來赦罪，解救，普渡眾生，使著爺哀能夠超脫，在從來吂識行過，該『酆都界內無相識，閻王殿上無人情』介冥路上，得著一種溫暖摎平安，希望行上金橋銀橋毋好去行奈何橋，毋好在地獄受著千般苦，希望能夠『長空雲散天一色，大地春回萬象新』，這就係孝子介願望。
仰般安到拜香山？香山，係觀音娘修行介聖地，拜香山，就係拜謝觀音娘娘介救命之恩。這隻故事，來自《香山寶卷》，係講原本男身介觀世音菩薩，化身妙善公主介故事。妙善公主係妙莊王第三個妹仔，聽講佢兩歲毋會行路，三歲毋會講話，四歲分厥爸掉在深山肚，好得老虎該兜動物摎佢畜大，九歲分人拈轉來，同時會講話咧，十六歲，就知好積榖存糧。
厥爸強逼佢招宰相介徠仔為駙馬，佢全力反抗，就走去百雀庵中食齋。無想著，厥爸更命令在庵中介主持人苦毒妙善，蹧蹋公主，喊佢逐日愛㧡千擔水，愛煮分500個人食，還愛上山撿樵，下山破樵。又將歸千隻介麻仔委到滿天下，喊佢一隻一隻去拈，分佢食不了苦，就會轉來。無想著，妙善堅毅忍耐，一一渡過難關。妙莊王當閼，又派出千軍萬馬，去放火燒百雀庵，五百僧尼嚇到像團魚落鑊，舂上跌落。無想著，這下竹園肚有人口中唸唸有詞，咬下白雪雪介手指，用力去啜膚身介血，然後噴向天頂，斯看著滿天落紅水，斯摎尼姑庵介火救烏忒咧，也救著五百人介性命。
妙莊王看著事情失敗，又下令愛摎妙善判處死刑，有人講，當該斧頭愛斬妙善介時節，斧頭就斷忒咧；用刀仔㓾，刀仔又羸忒，突然之間，一陣旋風，一條老虎飆等來，摎妙善銜走，一直銜到香山去；又聽講，妙善分厥爸㓾死以後，靈魂來到陰間，繼續念佛，判官感動，特別送佢還陽，在香山修道，佢，就係觀世音菩薩。
自從妙莊王火燒百雀庵，觸死妹仔以後，就著着大病，無藥好醫，有人摎佢講：「藥醫不死病，佛渡有緣人，你這介病，愛用親生妹仔介手摎目珠正可以醫得好。」佢就拜託兩個妹仔，兩個都毋肯，該第三個妹仔，又分佢㓾忒咧！這下無人好救佢啦！正經係『車翻崩岡無好檔，船到江心補漏遲』，仰般愛摎妹仔㓾死呢？唉！當在該萬般愁慮介時節，突然傳來消息，講香山有個女子，愛用佢介目珠摎手來救妙莊王，但是，毋肯講出姓名，妙莊王當暢，就用佢介手摎目珠醫好自家介病。
妙莊王愛感謝救命之恩，決定愛去西天恁遠介香山承蒙佢，為表誠心，甘願行路毋坐轎，一大群兵馬，共下行路去拜香山。後來正知，該隻細妹仔就係厥介三妹仔，也就係觀世音菩薩，所以，後來爺仔過身，就有男拜香山介儀式。
女打血盆，又安到拜血盆，係專門替過身介哀仔來做介科儀。係孝子捧等香爐跈等僧侶，在該禮讚哀仔十月懷胎介辛苦，同時替哀仔朝拜菩薩，期望母親解脫苦難，早日登仙。因為，頭擺目連尊者來到羽陽縣時節，看著當多女子在該血盆池裡背受苦，佢就問獄卒，正知佢兜係在生時因為生理現象，生產，打胎時節所流介鏖糟水污染了地神，所以死後會在地獄血盆池肚受苦。目連問：「該愛仰般正能夠解除這種痛苦？」獄卒就講：「在生愛有孝，敬重三寶，愛做血盆法會，誦血盆經，血盆肚介罪人就可以超生佛地。」目連為了渡化爺哀，就去尋厥姆，等佢在地獄裡背看著厥姆在一群枵鬼肚，枵到瘦浹浹，目𥍉𥍉，佢就兜飯分佢食，飯吂入嘴，就變成火炭，目連大噭，非常難過。
因為厥姆在生時節，逐日㓾狗打貓，殺生害命，看著僧尼，就喊人擎棍仔去打佢，拿石頭去擲佢；看著老人家，就放狗去咬佢。等到目連轉屋，盡多鄰舍投目連，講厥姆仰般壞啊！目連試著奇怪，就問厥姆，厥姆當閼講：「亻厓係若姆，亻厓講介你都毋信，去信別儕。哼！係講你毋信，亻厓就咒誓，假使騙你，亻厓七日之內就會分閻羅王捉去十八層地獄。」結果厥姆正經在七日之內就死忒。目連當傷心，就出家修行，得著神通，身超羅網，為了報答親恩，就去地獄救厥姆。目連救母介孝心感動天下，所以，後來哀仔過身，就有十拜十懺打血盆介儀式。
不管妙莊王仰般狠心，目連介哀仔仰般過當，做子女介，還係用自家介手摎目珠去救佢介性命，不顧危險去地獄救哀仔出來。男拜香山，女打血盆，還有盡多介微言大義，弦外之音，孝子不匱，永錫爾類，正經係感動人心，萬古流芳啊！
※此處的「介」為大眾通用的「的」，同教育部訂的「个」之意
