阿爸个大魚箱仔
【文、圖∕黃美貞】
該日仔，看阿爸在面書放一張怪手清河壩个照片，本旦兩片䃗崁脣，塞塞个牧草、菅草爪到淨淨俐俐，還有幾下個工人在河壩肚，將水面个水浮蓮角著歸角仔，鮮鮮个河壩水，連魚仔就看到現現，這條河壩就係陪等一伙房个細人仔，成人長大个遊樂園。
記得頭擺个河壩，總有捉毋忒个魚仔、蝦公同毛蟹，阿姆洗衫褲，亻厓同老
弟在脣項捉蝦公，蝦公大部分囥到石頭底下，一儕輕手輕腳扐起石頭，一儕就遽遽用手揞啊去，老弟當好膽，全毋驚蝦公个夾仔，連毛蟹就毋係厥个對手；有時節，亻厓會去尋跌到水肚个竹殼，用兩隻手托等，遽遽拿到沙埔仔倒出來，倒出來个係蝦公，就像著著獎券樣仔，暢到緊喊緊跳，輒常搞到溚潦，老弟就打赤膊走等轉屋。
在河壩撈雞鴨乜當生趣，過年過節，阿姆總愛辦幾下副牲儀，敬神拜伯公，一抹煞係自家畜个土雞土鴨，先在屋下同毛挷淨來，正用錫桶仔擐去河壩翻腸肚，長長个雞腸仔會餳來一陣陣个白哥仔、狗頷仔，該兜魚仔會用嘴去吮腸仔，亻厓兜就拉等腸仔在水肚行上行下，魚陣乜跈等亻厓兜緊泅，成時仔毛蟹也會來𢯭鬧熱，還有毋知死个蝦公去夾阿姆个腳趾公。
又有一站仔，河壩頭个工廠同牧場排放當多垃圾，河壩汙染當嚴重，歸條河壩像壢溝樣仔，臭到會夭壽，大家就毋敢行兼，強強就會無用忒了。好在政府推行環保，意識著青山綠水係亻厓兜个寶，正漸漸仔恢復元氣，摞摞仔看得著鯉仔、福壽仔，阿爸講：「河壩總算變淨了，這係亻厓兜个福氣，愛好好來保護正得。」佢不時去河壩脣行行仔，係有人釣魚仔就摎佢兜打嘴鼓，看佢兜釣著麼个魚仔，忒細條就勸佢放轉去；係看著人牽網仔、電魚仔，會用好話勸佢兜留功德分子孫，做事情愛看長遠，毋好斷魚仔个後代。
這駁仔，河壩生當多水浮蓮，毋知仔人恅著當靚，其實對魚仔影響當大，佢兜會無法度敨氣，嚴重个話就會死淨淨。阿爸个心肝肚試著盡毋盼得，就去拜託做議員个好朋友，帶等佢兜來現場看，大家來想計救河壩，救這日日看等个魚群。看阿爸舂頭磕額，食睡毋得，做子女个乜愁勞駁激。總係天公惜戇人，堵堵好有一个特別个計畫，做得請專家來處理，同河壩清到光華華仔，正換著阿爸个開容笑面。
還細个時節，總係希望有一個自家个魚箱仔，畜幾尾仔魚仔來看靚。現下，阿爸全心全意來看顧河壩，佢輒常講：「歸條河壩就係吾个魚箱仔，歡迎大家來遶尞。」無想著細人時節个遊樂園，現下變成阿爸个大魚箱仔，老人家細人性就怕係恁仰形！
註釋：
【䃗崁】bogˋ kam：隄防。
【塞塞】sedˋ sedˋ：形容繁茂、茂密的樣子。
【水浮蓮】suiˋ peuˇ lienˇ：布袋蓮
【現現】hien hien：清清楚楚
【溚潦】dab lauˇ：溼透了，形容溼淋淋的樣子。
【行兼】hangˇ giamˊ：走近一點。【摞摞仔】lo lo eˋ：稀疏。
【恅著】lauˋ doˋ：以為……。
【舂頭磕額】zungˊ teuˇ kab ngiagˋ：形容非常忙碌、到處奔波的情形。
【愁勞博激】seuˇ loˇ bogˋ gidˋ：形容非常憂愁、擔心。
【光華華仔】gongˊ vaˇ vaˇ eˋ：很光亮的樣子
