中央大學電子報

雙連梨社會企業

【文、圖∕薛常威∕國立中央大學客家語文暨社會科學學系在職專班碩士】

　 卓蘭係苗栗縣最南片个一隻鎮，差毋多80%个居民係講饒平摎大埔客話个客家人。卓蘭生產當多美味个水果，像葡萄、柑仔、梨仔，當受人歡迎。摎其他較鄉下个客庄共樣，卓蘭个後生人、學生乜緊來緊少，在較山項个雙連社區个雙連國小嗄收毋着學生，強強會分人關忒。

　　 中原大學企管系个李明彥先生看着這偏鄉小學个問題，啟動大學社會責任USR，摎學生走去雙連社區做調查，發現着小學係社區居民活動摎聯絡感情重要个所在，一日斯三枋公車會經過這社區，係小學廢除忒，學生斯愛行到七公里外去外地讀書，後生人會趁等徙出去，最尾歸隻社區摎「高接梨」這隻產業會共下無忒。愛阻擋廢校个危險，就愛解決當地產業个困境開始。

　　 雙連个梨仔品質異好，毋過以前農家斯知煞猛打拚種梨仔，割好就直接賣分盤商，農民無法度講價，還愛自家分擔天災个風險。故所中原大學个團隊提出建立自家个「雙連梨」這隻品牌，改變產銷結構个做法。

　　 2016年中原大學設立「雙連梨社會企業」，得着果農摎雙連小學个支持，公司做社區个中間商摎通路，降低農民賣東西个風險，摎公司賺着个利存分農民摎學校，提高在地農家个收入，同時乜分學校得着幫助，成功化解偏鄉小校廢校个危險，創造社區經濟發展，順續做得分後生人回轉故鄉做頭路。

　　 「雙連梨」係講一群大學生利用政府公部門个資源，救下偏鄉小學，繁榮地方个故事。大學生經過幾下年在卓蘭社區駐點，推動服務學習个課程摎理念，尋着有共同理想个朋友。用群眾募資个方式來尋本錢、建立制度。有參加計畫个學生畢業後又加入這「雙連梨社會企業」上班，雖然佢兜當多係城市人，乜摎卓蘭當做自家个第二隻故鄉。