下課十分鐘（上）
【文、圖／張捷明／國立中央大學客家語文暨社會科學學系在職專班碩士】
今晡日鸚哥先生，在油桐花樹下个森林小學，上客家話課。
下課鐘一響，先生講：「下課囉！」大家摎先生行禮講：「先生恁仔細！」等先生一行啊出門外背，大家就相賽衝等出。
手腳盡遽个係猴仔同狗仔，兩儕共下走到教室門口。猴仔个手伸長長，手指尾一下揬著門桱就講：「亻厓先到，分亻厓先出去。」狗仔也講：「麼人講？汝無看著吾个腳趾頭既經先踏著門檻吔係無？分亻厓先出去。」兩儕擠在門口，肩胛對肩胛出暗力，無人肯相讓。
猴仔一轉身，屎胐捩往出，想愛退啊出先走，狗仔一看，哪有恁～好來讓佢，佢也一出力環一圈，兩儕又屎朏對屎朏鬥共下。跈等第二遽个係老鼠仔，佢無搭該兩儕相鬥仔，自家在門角个縫仔項鑽啊出！第三遽个係畫眉仔，佢在該兩儕个頭那頂飛等過。第四個係長頸鹿，佢腳長頸根還較長，企到後背毋得出，無結無煞。
又過後背个兔仔，緊蹬腳緊愛噭愛噭个講：「亻厓會拉尿吔啦，先分亻厓過好無？班長！你看哪！」班長係豬妹妹，佢坐在最後背，佢將目鏡戴起來一看，又係該對盡好鬥个山猴仔同石頭狗在該作怪。
豬妹妹先「oˇˇi～」一聲大大聲，該係佢發譴該時節，盡慣嘴个第一聲，接下來豬妹妹就愛罵人了。豬妹妹平常時盡溫純，同大家都盡好，就單淨這兩儕，逐擺就愛豬妹妹發譴正會聽話。
門口這兩儕，耳公無聾，也有聽著豬妹妹發譴吔，兩儕企正來，你翕亻厓，亻厓翕你，吂等豬妹妹開嘴罵，兩儕个屎朏就像講好勢共樣，共下捩啊轉，頭那向外背，起～腳就走到濛線。猴仔跋到油桐花樹樹頂去吊晃槓仔，狗仔走到油桐花樹樹下搞溜滑梯。
門口个長頸鹿閃開分兔仔先過，兔仔嘴講：「恁仔細！......」話吂講煞，該腳斯～全無停跎，咚！咚！咚！咚！咚！咚！……，遽遽跳去便所屙尿吔！後背个花貓公扐等籃球愛去運動坪，雞公、狐狸、山阿鵲，陸陸續續行往出，教室伸著班長豬妹妹在該掃地泥，䘆公企到教室門口問講：「豬妹妹班長，亻厓出去行行啊，看一下山項个油桐花，敨一下氣好無？」豬妹妹應講：「亻厓忒大箍，出出入入忒多擺，驚摎門尖爆忒，亻厓掃地泥兼減肥就好吔！」䘆公講：「你就係忒過煞猛讀書，無出去行行啊！正會緊來緊肥，還愛戴目鏡。」豬妹妹分佢講到盡敗勢个講：「好啦，好啦，亻厓共下出去啦！」䘆公當歡喜个講：「係哪，恁樣就著哪！毋過你做得分亻厓參詳無？分亻厓跋到若背囊項，正跈得你著！」豬妹妹講：「亻厓就知哦！你賣懶得斯吔！」䘆公講：「毋係賣懶啦！亻厓恁樣正做得同你緊行緊講話。你放心，亻厓會將你个背囊準運動坪，趖過來趖過去，一片運動一片打嘴鼓，恁樣毋係盡好咩！」豬妹妹班長講：「你還精喔！屙尿合抓鹹菜，屙屎合挖芋仔，上來啦！」䘆公講：「恁仔細！」就煞煞從豬腳趾開始跋往上。
