桃園客家平安戲同三官信仰
【文、圖∕徐貴榮∕國立中央大學客家語文暨社會科學學系兼任助理教授】
發音人 徐貴榮—四縣腔
平安戲同收冬戲係客家庄逐年傳統謝神个戲仔，一到做戲時節，定著係地方項一年一度个鬧熱盛事，廟坪前人尖人極，街路項鬧熱煎煎，家家戶戶請人客。毋過當多人分毋清楚平安戲、收冬戲有麼个無共樣？還有人講平安戲就係收冬戲，想真來，還係有兜仔差別。平安戲、收冬戲都係民間承蒙上天同神明賜分人民平安个戲，「還福」个性質，內涵差毋多。到底哪仔無共樣呢？
首先來看客家庄做戲个時間，「平安戲」係一過忒七月，從舊曆8月初2到16為止，最慢毋會超過10月15下元水官生，這兩時還吂有收冬喔！桃園安到「平安戲」。以楊梅地區來講，街項个錫福宮8月15、高山頂啟明宮8月12、三湖三元宮8月初10，平鎮地區鎮興里鎮安宮8月11、雙連坡福明宮8月14、中壢地區个興元宮8月16、三聖宮8月11。就算在伯公廟前做平安戲个，也係這段期間，像中壢新街北門福德祠8月初2、龍岡福德祠8月初4、健行路健福宮8月14、白馬莊福德祠8月16。還有毋係三官大帝做主神个廟，像平鎮東勢建安宮8月12、觀音復興宮8月初2、觀音甘泉寺8月15也會做平安戲。其他縣市「還福」做戲个時間，大部分愛等到翻槓禾割忒過後，大約係在農曆十一月底到十二月初仔个年尾，莊民較有閒欸正舉辦，故所安到「收冬戲」，就毋係安到「平安戲」唷！
還有，做麼个安到平安戲呢？有人講過忒七月个鬼月就平安吔！毋過，桃園地區做平安戲係同桃園客人主要个信仰三官大帝有關。桃園地區个客人認為「起福、還福」，「起天神、還天神」主要个天神係「三官大帝」。桃園市總共有24間三官大帝廟，係全臺灣最多三官大廟个所在，也係全臺灣客家地區最早有三官大帝廟个所在。最早个三官大帝廟，係八德霄裡个玉元宮，本來主神三官大帝，日本大正4（1915）年整廟正請來玉皇大帝做主神，變到天公廟，改名玉元宮，在乾隆16（1751）年就起廟，到今兼兼仔會有270年吔。也有高22公尺，全臺灣最高个三官大帝廟—平鎮雙連坡个福明宮。
圖1 世界最高个三官大帝廟—平鎮雙連坡福明宮高22公尺（2018.11.17攝）
桃園24間三官大帝廟差毋多分布在南區客家庄所在，中壢、楊梅、平鎮、龍潭總共就有19間，無就兼客家庄所在个八德霄裡、大溪南興、員樹林一搭仔，該兜又乜係客家庄。故所做平安戲个地點定著在三官大帝廟坪。無三官大帝廟个所在，有兜還用三官爐跈爐主輪值，像新屋八月初3做平安戲个八本簿區域，八月15做平安戲个中壢舊社五里，就臨時搭棚仔。在伯公廟做平安戲个，就會請三官大帝來祭祀、看戲（圖2）。其他縣市年尾个「收冬戲」做戲个廟，就無定著在哪間廟吔！主要係在該地方信仰中心。
圖2 中壢舊社在新明街脣搭臨時棚做三官臨時神位，慶祝三官生做平安戲
（2017.10.05，歲次丁酉年8.16攝）
圖3 中壢林森里伯公祠慶祝三官生日，請來三官大帝看平安戲
（2019.9.12、歲次己亥年8.14攝）
第三就係逐年由廟項正月15上元天官生「許福」「許天神」，到10月15下元水官生抑係年尾12月15「還福」「還天神」，客人就在正月15抑係10月15「天神爺生」這日「打新丁」，感謝「天神爺」保佑添丁進口，這天神爺就係「三官大帝」啊！頭擺伙房屋大門圍牆脣也有服祀天神爺，用紅字寫等「天官賜福」字樣，可見客人對三官大帝个敬重同信仰。桃園地區有兜地方个起福、還福、選爐主、打新丁，還會在做平安戲个時節，這也係桃園平安戲同三官大帝當密切个一點。
時到如今，毋管平安戲抑係收冬戲，還係客家庄逐年傳統謝神个戲仔，宮廟還福个科儀、戲仔還係照做，毋過，緊來緊走味哩！毋單只廟坪前，看戲个貓仔無兩隻，人無幾個；廟前个街巷，恬靜恬靜，無麼个人賣東西咧；也無半儕人愛請人客，連客家庄也做起學老戲仔來，無就做布袋戲，意思意思仔，將就將就！尋毋轉頭擺鬧熱个場面，醹醹个人情味哩！
