好命狗
【圖／李岳哲；文／邱一帆／國立中央大學客家語文暨社會科學學系客家研究博士班】
發音人：邱一帆（四縣腔）
撮兩扡仔你當好食个飼料〈該當講係你个飯菜〉，𠊎手巴掌一打開來，一粒一粒个美食，在若个目面前。你四腳坐好勢，目絲絲仔，舌嫲緊舐、牙齒緊咬、嘴緊停動，㕸㕸滾个聲音，真真。𠊎知你無時間看吾个面色，乜無心去聽四面八方个聲響，這下个你又飢又渴又𤸁欸！遽遽食、食飽好歇睏。
𠊎講你正經當好命，實實在在係一條好命狗！一出世來，植入晶片就跈等𠊎。你食飽睡、睡飽食，屙屎有人掃、圓身屙糟有人洗，還愛定期帶你去注預防射。係有麼个毋鬆爽，定著黏時帶你去看醫生。𠊎去哪位尞，乜會帶你去尞，全臺灣都有俚行過个腳跡，留下个身影。𠊎講你正經當好命，堵著𠊎恁好个主人，乜出世在恁好个年代。
𠊎識聽人講過，在貧窮个年代，差毋多係民國四十年代到六十年代，該央時，當多人苦到屙痢肚，有兜無麼个肉氣好食个人家，就會捉你兜个祖公祖婆來㓾，煮兜仔狗肉來補一下！像這下秋冬轉寒个時節，當堵好！前一日還看著个，隔壁鄰舍好好个狗仔，第二日就自從毋識過再看著哩！你想該條狗仔走到哪去？仰會永久無再轉屋呢？莫講人家畜个狗仔，該央時哪看得著麼个遊遊野野、發鹵生蚩个流浪狗？毋係全全走入欸人家个肚屎肚係麼个？有一段時間，臺灣有當多賣狗肉个食店，名安到香肉店，生理人為著賺兜仔錢，順續仔滿足人家个舌嫲肚屎，乜毋知㓾忒幾多條狗仔咧？
講到這，你係聽得識𠊎講个，就知你自家正經係一條好命狗，有恁好个命，有恁狗屎个運，分你生活在恁好个年代，恁好个人家。你係聽得識𠊎講个，你乜會知，做麼个𠊎愛摎你个名仔安到lucky。
