學生同觀音
【文、圖／鍾榮富／南臺科技大學應用英語系講座教授】
發音人：鍾榮富（四縣腔）
上一期，本欄講著「先生同佛祖」，簡單講，係教書个人愛有佛心，初期个想法愛有「普渡眾生」个理想，萬一達無到理想，至少愛有「只度有緣人」个瀟灑，使毋得對自家過毋去。有讀者來信問，嘎做先生愛仰仔看學生呢？故所本文就來談先生心目中學生个心像，心肚內學生仔个形像。簡單一句話，先生愛將學生仔看做觀音普薩。
聽講頭擺觀世音得道以前，千般修練，萬般設法，一心想愛開悟，正使得擺脫世間因果，豁忒紅塵貪嗔苦慮。可惜嘗試了過各種修練方式，總係無辦法靜下心來。往往在高山頂上，坐啊在人跡罕見个竹林中，想愛遠離紅塵，好好修練，可惜耳邊傳來竹葉分風吹到窸窸窣窣个聲音，有時高亢同阿惜惜个聲音共樣，有時傳來低沈無法分辨个風聲，像秋聲、像蕭颯、像人音、像鬼叫，無論係哪種聲音，總係在心房捶打，無法度挶走種種魔音。揮別高山，行到山壢靜坐，盤腳正坐啊好，就聽到水聲悠悠渺渺，蟲聲飄飄忽忽，又遠又近，又薄有尖，一心想愛去分辨个種喧囂亂聲，心無辦法靜下來。
經歷了種種个失敗以後，觀世音來到浙江个海潮小島靜修，心正恬下來，接受海潮高低聲音个刺激同挑戰。初時，海潮高漲，一波一波連天大个海浪對岸上拍打、衝擊，浪花起起落落，引起了澎湃个潮聲，像群魔亂舞个得人驚个聲音，聲聲刺耳，聲聲都喚起心底个各種世俗凡念，愛斬也斬毋斷，愛離也離毋開，但係佢不動於中，盤腳恬恬靜坐，用力抵抗凡間个魔幻雜音。後來，潮水漸漸慢下來，潮汐起落个聲音變做低低个呼喊，親像失落爺哀个細人仔，又噭又喊，低泣哀鳴，動人肝腸。但係觀世音不動如山，始終心定如水，半點波浪都無。就恁仔，毋知過了幾久，觀世音耳邊聽毋著任何聲音，雖然佢身邊个海潮起落如山高，急遽如閃電，怒吼足以撼動巨岳深河，佢心中一片清明，一片清澈，無雜念，無聲說。就恁仔，佢得了道，腳底起蓮花，施善分世人。
𠊎講課最高个境界，就希望聽課个學生仔，人人入了「心中無雜念，一片清明」个世界，不論先生在該高聲朗讀，精彩表演，又講笑話又做阿丑仔，想盡辦法愛博取學生仔个注意力，可惜所有个聽眾，都聽毋著先生个聲音。就像觀世音共樣，坐啊在海潮脣，聽毋著海潮个拍打聲。到這種境界，先生正功德圓滿，學生仔正毋驚未來社會上老闆个念念，更加毋使擔心別人个指指點點，始終保持自𠊎，做自家喜歡个事情。
