細魔豆客語學園當有「藝」思
【文、圖／葉金華／永和國小】
「語言斷、文化滅、族群絕」，語言若係當久無用到就會定定仔分人添放忒。今這下選修客家語个學生仔緊來緊少了，普通一隻班級選修客家語个學生仔用幾隻手指就算得出。吾學校在低年級起勢推動客語結合校訂課程个教學，分一般个學生仔有機會接觸客家話。
低年級个小學生仔性體活潑，對新鮮个事物充滿了好奇心，為著愛準備適合佢兜个課程，吾學校有幾隻先生輒常會聚總共下研究、參詳。為了設計較餳人个課程摎活動，分學生仔試著有興趣，學起來好搞又無壓力，𠊎兜就像生命共同體，用心去尋摎教學相關个主題教材、收集資料，互相合作共下研發，這擺个學習目標係從「認識豆」到「智慧豆」，進行「拈豆仔」个活動。
𠊎設計个課程有一項比賽，先教學生仔認識烏豆、黃豆、綠豆、紅豆摎花豆這五種豆仔，嗄下來摎這五種豆仔放到碗公肚摻共下，請學生仔抽卡牌，再過從碗公拈出卡牌指定个豆仔，數量較多个小組做得搶著分數。小朋友个目珠愛看真、手指愛靈活，還愛要求團隊合作，細人仔搞到盡歡喜，贏个小組斯暢到天轉笠嫲花1喔！𠊎也摎學生仔做機會教育，若係輸忒个乜無相干，毋使恁計較，愛保持風度、下二擺再過來就好了！
「Do Re Mi Mi Do Mi Sol，La Sol Mi La Sol， Sol Mi Do Mi Re Do La，Sol Do Si Re Do 。大大細細得人惜，圓圓个豆仔，一粒粒拈起來，做毋得打爽。」這首歌仔《拈豆仔》改編自國語童謠《螞蟻搬豆》，歌詞本旦个意思係蟻公尋伴共下搬豆仔，翻做客語無恁好唱，故所𠊎摎學年另外兩隻客家籍个先生—曲妹摎卿妹，三儕合作討論了當久正想出來頂高个客家歌詞，對跳舞律動有專精个卿妹還編了配合歌詞个動作來教學生仔。學生仔个學習成果異好，兩下半就摎歌謠同動作記起來了，轉去還會展風神、唱唱跳跳分屋下人看，家長乜試著異生趣。
原旦吾同事个班項只有兩隻學生選修客家話，上了這門課程了後，過多加兩隻，加倍變做四儕，佢兜个家長乜當同意。感謝這門課程，分學生仔有機會從小培養多元文化个包容能力，學習互相尊重。聽得識另外一種語言，就像另外生了兩隻耳公；曉得講另外一種語言，就像生出另外一條舌嫲，認識另外一種語言，就像打開另外一扇窗門，乜係一件當有價值个事。
客話諺語：「三兄四弟一條心，門前黃泥變成金。」正經一息都毋會差，舊年吾學校个教案毋單淨有得名，還拿著客委會頒發个獎金呢！今年乜傳來好消息，分大自家都試著當榮幸。十二年國教課綱講个「自發、互動、共好」，無論係先生還係學生，都做得拿來做勝利人生个準則喔！
注釋：
天轉笠嫲花：音tienˊzonˋlibˋmaˇ faˊ；形容一個人得意快樂的樣子。
