為老不尊，教壞子孫──川普同拜登个辯論
【文、圖／彭欽清／國立政治大學退休教授】
發音人：彭欽清（四縣腔）
九月三十有看米國總統第一場辯論个人，十股怕有九股會看到膦火砰著。世界各國較有影響力个大報通體就講到無一垤好。米國自家个政治評論者還較直接講：祭衰人，瀉祖宗八代。
米國南方大學一個心理學教授講：看過辯論个人用當多个字眼來表達想法，有一隻字脫體好：traumatizing(引起身心个創傷)。 在社群媒體項，識堵過家庭暴力、種族暴力還過情緒糟蹋个人講，在辯論肚項看著兩儕欺翕來欺翕去、氣浡浡仔、大伯伯仔个樣相，試著當艱苦，會愐著得人畏个事情。大體人就像親身感受著身心著傷。看到恁虐削，故所真多人無看煞。
歸個辯論亂操操仔，佢兩儕從頭相罵到尾，你看𠊎無，𠊎看你斜斜。總講一句就係無規無矩。兩儕人相賽講對方無頭腦，川普打斷拜登个話七十一到，拜登笑川普係阿丑琢，還大聲喊佢：漦貨仔，你做得恬恬無？主持人緊喊佢兩儕毋好緊剪人个話，毋過無效，搣到佢尿汀汀仔，聲胲乜大起來。
看辯論个人過心理衛生專家講，這場面就像失忒功能个家庭，抑係性擎起來就愛尋對方出水个兩儕人。情緒糟蹋係借批評人抑瀉人面皮來控制別人个一種方法，也包含同人安難聽个名仔，或者看人全無。
川普提起拜登个倈仔中藥毒个事情，想愛搣衰拜登。拜登應講，厥倈仔積極面對中藥毒个問題，佢試著真光榮。在推特項，有兜支持身心障礙人權个人講，川普緊剪拜登个話，係想愛分會結舌个拜登出醜。辯論第二日，主辦單位講，跈等會定一條新个規定，麼人犯規， 厥「賣古」就會切忒。
對看忒頭場辯論試著身心有著傷个人，這位心理教授建議，莫去看第二場个現場轉播，等第二日正看剪下來个畫面，無就看專家个分析，恁仔就毋會看著看誒會捶心肝个場面。
川普同拜登兩個就七老八十三誒，世面看誒恁多，係老腳士誒，吂知兩个都擔著老癲東症，在恁正式个場面講恁多恁難聽个話，這種帶壞帶樣个人，愛仰仔做世界國力盡強个國家个總統？ 莫怪英國个泰唔士報會寫講：川普同拜登个第一場米國總統辯論輸來最悿个係米國。
