列車倒輾後
【圖／李岳哲；文／賴維凱／國立中央大學客家語文暨社會科學學系兼任助理教授】
賴維凱老師 聲檔 — 列車倒輾後（南四縣腔）
「列車倒輾後，愛開這左片个車門……。」八月半个高鐵，無閒洎杈，載等會浮出來、緊鬥鬥仔个「箭仔」，射到最想念个老屋。弄擺蓋毋好在人尖人个時節跈等歸，這擺毋知麼个風，一拚歸臺北，毋使十分鐘就擐好行李，逐等仔出發。
看等相片項「朗朗大坪个月臺，白色間等烏色同柑仔色个柳條，過行加9節車廂，就看得著該光，行啊行仔，驚怕毋知哪久，會做一下哱出一大波籮个人客，嘰嘰嘎嘎，出出入入，上上下下，過後，嗄歸到恬靜，做你繼續行去該光。」這畫面實在餳人、實在鬧！
行到車廂項「還係愛聽該毋入耳个廣播聲」。心肚仔緊愐緊懊躁，毋過還係吞下去吔，為著愛拜託佢載亻厓歸屋下。看著10年前客家電視就報導个新聞，一直到今年，亻厓還係提出共樣个意見，得著个答覆總係狗食糯米─無變！
「倒輾zan」同「到站zam」，對聽得識客个人來講，嶄完清苦；對聽毋識客个人來講，乜異辛苦；對愛學講客个人來講，該就壞蹄吔哪！期待該天「光」日遽啊來到，高鐵正式「到站」吔！
1.倒輾：音do zan；為高鐵客語廣播的諧音字。詳見2010-05-19「台北輾到了 高鐵客語不標準http://web.pts.org.tw/hakka/news/detail.php?id=129099？」
新聞「咒你旅途愉快？高鐵客語廣播惹議」2015-11-02
http://web.pts.org.tw/hakka/news/detail.php?id=56120
2.懊躁：音au zau；心中鬱悶、生氣。。
3.清苦：音qinˊ kuˋ；身體或心理的痛苦。
