中央大學電子報

平鎮褒忠祠、中壢仁海宮聯合慶讚中元義民祭典

【文、圖∕徐貴榮∕國立中央大學客家語文暨社會科學學系兼任助理教授】

　　 逐年个舊曆7月20，人講「義民爺生」，係全臺灣客家人紀念義民祭典最盛大个日仔。「平鎮褒忠祠」就係「平鎮義民廟」，逐年7月20這日義民慶典（圖1），同「中壢仁海宮」慶讚中元、普渡孤魂共日（圖2）。毋知哪央時開始，這兩間廟聯合慶讚中元祭典，由中壢13大庄分14區輪值主辦，故所13庄庄內逐年就有兩隻庄鬧熱，每一區隔大約7年就會輪着一擺，鬧熱个盛況毋會輸新埔个義民廟喔！過去人講「中壢大拜拜」！

圖1褒忠祠義民爺祭典現場09071630

圖2 仁海宮前普渡法會台09071540

　　 「平鎮褒忠祠」在宋屋庄，係從新埔褒忠亭義民廟總廟分香過來个，乾隆56（1791）年創立到今，有230年唷！毋過，同新埔義民廟無共樣个係平鎮義民爺有紅面像關爺个神像金身喔！「仁海宮」在中壢新街，故所人講「新街廟」，清朝道光年間創立，到今也有兩百空年吔！初下碼拜觀音菩薩，後來商業發達，到北港朝天宮分香過來，觀音菩薩徙到三樓奉祀，主神變到媽祖，這下安到「中壢媽」。

　　 仰仔講這兩間廟个祭典會由中壢13大庄共下輪值呢？因為這兩間廟共樣在頭擺个「澗仔壢十三庄」內。中壢在清朝康熙年間就有「澗仔力社」个名，可見這搭仔係平埔原住民个地方。雍正過後，客人慢慢仔緊徙來這搭仔開發，到乾隆二十零年个時節，正安到「澗仔壢」。後來因為在台北到新竹之間，愛在這歇宿，正安到「中壢」。「澗仔壢」總下有13大庄，包含這下中壢區个三座屋、芝芭里、青埔仔、崁仔頂、水尾仔、後寮、興南、石頭、埔頂9庄，平鎮區个廣興（後來變到宋屋）、安平鎮、北勢3庄，楊梅區个高山頂1庄。「澗仔壢」最鬧熱个所在係「中壢老街」，到道光初年，東片兩公里遠个「新街」正發展起來。因為中壢老街較鬧熱，就獨立一區，變到13大庄14區共下輪等來舉辦這兩間廟个祭典。

　　 祭典三日前起燈篙（圖3、4）、安大士爺，㧡擔、奉飯，就開始鬧棚吔！第二日請道士誦經引渡孤魂聽法，磅大豬、㓾大豬，臨暗仔放水燈，家家都當無閒；到當日下晝普渡、做戲，臨暗仔神豬、藝陣、鑼鼓遶境轉到廟坪展示、分人看，鬧熱就起勢吔！有兜人家屋面前擺起香案、牲儀、粄果，普渡好兄弟；也有社區搭篷仔擺桌聯合祭拜。逐家人到暗欸準備到豐豐沛沛請人客！食飽吔去廟坪看大戲、看大豬、看表演、看鬧熱。豬公打着等數个人，同豬公拱到大大隻分人欣賞，頭前擺香案、牲儀、粄果、紙錢敬奉，脣項請打八音个人放送到大嫲聲，吹打喊唱，紙炮仔「并令磅浪」磅無停，街路巷人尖人極、掖麻掖米、賣東西个嘶胲另命在該喊，該就大鬧熱吔！

圖3 2020褒忠祠燈篙

圖4 2020仁海宮燈篙

　　 今（2020）年个7月20祭典，平鎮義民廟輪着芝芭、三民兩里，廟前三隻表演看臺，臺頂表演个人，煞猛在該扭、在該跳，臺下人尖人在該看。中壢新街廟輪着中壢後站後寮庄11隻里主辦，廟前延平路從元化路到普義路這截封街搭臺，請歌星來演唱，也係鬧熱煎煎。怕係時代个關係，儕儕愛上班無閒，環保觀念个深入，緊來緊無人愛畜大神豬，也當少人為着大鬧熱來畜豬仔！雖然兩隻輪值區个特等豬公都有千四零斤（圖5、6），毋過參加比賽个豬公也伸着十過隻定定。送來平鎮義民廟坪前个還有6隻大豬公，中壢新街廟个大豬公正3隻定定，毋過恁多年來，年年設立「創意神豬」比賽（圖7），得獎个有送來廟坪展示分人看喔！

圖5 2020褒忠祠余輝煌先生畜个特等神豬1466斤

圖6 2020吳祥榮先生畜个特等神豬1450斤

圖7 2020仁海宮創意神豬，由林文科先生、和興公益社、益左工程行、林家眾信士等敬獻个神豬。

　　 也怕係少子化个關係，毋單止豬公緊來緊少，暗晡頭看鬧熱个人也緊來緊少，大人帶細子來看鬧熱个還較緊來緊少！這下講愛請人，無麼个人愛分人請；愛分人請，無人愛請人咧！頭擺講：「分人請，食得飽來碰得瘦。」家家戶戶熱情、豐沛請人客个情景，就伸着口傳个記憶咧！這隻民俗傳統愛仰般來傳承下去，除忒老个交等下去，就怕愛看後生人仰般想了唷！

※此處的「着」，同教育部訂的「著」之意。