兒孫自有兒孫福 莫為兒孫做馬牛
【文／何石松】
發音人 何石松—海陸腔
兒孫自有兒孫福，莫為兒孫做馬牛，意思當明顯，係講摎子女當做心肝寶貝介爺仔，在用盡方法以後，試著子女還係無幾出息，無達著自家介理想，一閼之下，斯摎麼介都掉忒，看破咧，毋當來去齋堂食齋，自家烳來自家煮，一儕飽來全家飽，就講：兒孫自有兒孫福，莫為兒孫做馬牛。
其實，佢係仰般惜自家介子女啊！就像《紅樓夢》裡肚好了歌所講介：「痴心父母古來多，孝順子孫誰見了」，也係「月到中秋光明少，人到中年萬事休」付出一生人介青春年華，結果係自家越來越老咧，無力咧，哎！毋使恁多好愁，一支草一點露，細人仔毋使管恁多，佢斯有自家介福氣啊！
聽講頭擺有一個人，安著羅秀才，本來生活當好，有餔娘子女，但是，自從參加科舉考試失敗以後，日仔就較苦咧，為了改善生活，斯到外鄉去做教書先生。幾年後長兜仔錢銀就回轉家鄉，看著自家介徠仔又聰明又煞猛，當歡喜。佢就想試看自家介徠仔有進步無？佢指等天，問厥徠仔：「天愛對麼介？」厥餔娘驚厥徠仔毋會回答，就指等地泥下，無想著地泥下恁堵好一堆雞屎在該，佢就講：「雞屎！」，厥爸無幾歡喜，又問佢：「阿爸愛對麼介？」厥姆又煞煞摎厥徠仔比手劃腳，指等自家介胸脯前，厥徠仔黏皮講：「乳姑」，毋知係望子成龍介心昶遽，抑係對自家介徠仔失望，試著這隻徠仔無效咧，無好望，一下焗心，自家就離開家門，食齋去咧！
老公離開以後，餔娘也慢慢仔想較開，人講啊「惜子毋當教子」，斯開始一片料理家頭窖尾介事務，一片抽間教教徠仔讀書，不過，自家能力有限，無辦法教佢較深介內容，人講：「有教做狀元，無教變乞食」，佢就將所賺介錢，去請先生來教佢，無想著請來介先生全部分佢閼走咧！一共請了五個先生，等到第六個還係教毋下去，也決定愛走咧。
先生摎細人仔介阿姆講：「『可以領人千斤擔，莫領人介小孩兒』，哎！你介細人仔實在難教，在下不才，毋敢教下去咧！」無奈何，餔娘人也知自家介徠仔毋上教，就送先生轉。行到一條橋，看著橋下一隻死蛤蟆四腳惹天，像一隻「出」字共樣，在該一下沉來一下浮，教書先生像人無看著樣，斯足兼啊過去，餔娘人就講：「哎！罔你讀聖賢書，仰般，儆惜文字，你全毋知！將該隻「出」字足兼過去，難怪細人仔教毋好啊！」先生雖然試著當敗勢，一下就摎心肚介委屈講出來：「好啦！實在毋係亻厓教毋下去，係你昶惜啦！該也做毋得，這也做毋得，亻厓正經懶懶呢！你還講亻厓看著出字像無看著樣，摎你有徠仔毋好好教，毋係共樣乜，你愛知唷「『烏墨寫字字變烏，偷蔥縱子子變賊』，你係有心愛子女出頭，希望你照亻厓介方法來教，保證若徠仔可以考著狀元啊！」
果然，在教書先生煞猛教導，餔娘強力支持之下，細人仔學問大進，毋使十年寒窗無人問，果然一舉成名天下知，正經中狀元咧。
這位羅公子為了報答哀仔介養育之恩、先生介耐心教導，特別為厥姆做生日，大請人客，四面八方不論熟似也毋熟似，全部都可以來分佢請，一時人聲濟濟嗟嗟，紙炮並令磅朗，鬧熱滾滾，當然，也希望厥爸能夠轉來，該就當圓滿咧。羅秀才聽著消息，特別趕轉屋下，不過，離開家鄉恁久，無人識佢，兼資，佢又講佢係一隻和尚仔來化緣，還較多人毋知佢係麼儕。何況，今日係狀元公請人客，來來往往，貴賓長官，金晶𥍉爧，相當多人介好日仔，看門介毋敢懈怠，看著和尚仔，馬上通報主人，狀元公介哀仔，也毋知該和尚仔就係厥老公，遽遽斯賞佢錢銀，佢講佢無愛；請佢食酒，佢又講無愛，聲聲句句講愛見狀元公，等到佢見著狀元公以後，摎厥徠仔看了又看，認真端詳，想愛認佢，又毋敢認佢，一句話都講毋出，可惜啦！厥徠仔也毋識佢，思量萬般之後，斯在壁頂寫出四句話：
離開家鄉十八秋，千錢斗米亻厓毋收；
兒孫自有兒孫福，莫為兒孫做馬牛。
大家看著這幾句話以後，正知這隻和尚仔就係狀元公介阿爸，還來毋掣請佢
落來食酒，佢斯像一陣風共樣，一下仔斯毋見忒咧！
※此處的「介」為大眾通用的「的」，同教育部訂的「个」之意
