美濃啖糕堂
【文、圖∕薛常威∕國立中央大學客家語文暨社會科學學系在職專班碩士】
發音人 薛常威—四縣腔
高雄美濃係南部盡有名个客家庄，這位總共正3萬8千人定定，百分之93係客家人。摎當多客庄共樣，雖然環境當靚，當好尞，毋過還係當多後生人出外尋頭路，人口緊來緊少。
在美濃个永安老街，美濃國小對面有一間兩棧高，六扇窗門，當古早个洗石仔樓，這其實係以前日本時代就有个診所「保壽堂」，診所已經停業當多年了。
這下个店頭家係後生个麵包師傅，兩公婆毋盼得這診所舊忒、壞忒，斯摎倨買下來，重新整理過，保留原本診所个門面。裡背肚个掛號櫃檯、書櫃頂个醫學書，乜盡量照本來个樣相保存下來，來保留美濃人个記憶。
店主人參加客委會个「人才留美計畫」，就在這老屋開了一間麵包店，安到「美濃啖糕堂」，啖糕堂利用美濃在地个食材做原料，賣个東西乜大抵用在地小農生產个食材，開發當有特色个麵包、雞卵糕。像美濃係台灣最大个水蓮產地，佢兜就用水蓮來做水蓮吐司、水蓮麵包。在啖糕堂，人客乜看得著做麵包个過程，二樓整理做藝文展覽空間，免費提供學校摎社區辦展覽，希望有還較多个人行入來，食麵包个時節，乜做得感受診所以前个風貌。
「美濃啖糕堂」為恬靜个美濃帶來人客，乜當受當地居民个歡迎。這故事摎大家講，本來係一間強強會橫忒个老屋，經過後生人用心个重新整理，開了一間新个麵包店，毋係單淨做生理賺錢定，乜做得摎地方帶來鬧熱摎繁榮。
