借漢字个準則
【文／羅肇錦∕國立中央大學客家語文暨社會科學學系榮譽教授】
發音人 羅肇錦—四縣腔
從細聽世大人講「做人做事愛有準則」，算來麼个安到準則，亻厓一直疑疑狐狐。一下變老人家吔，正知準則係大家認定做得比對个規則。像賢孝爺哀良善對人係做人个準則，這還算異容易了解，但係做事个準則，就無恁該喔。因爭做人个準則大概做得自家來掌穩，但係做事个準則還愛考慮環境个因素，也就係愛考慮別人个立場。該就愛定出一個對比个規則，處理起來合情合理、合規合法，正安到做事有準則。
像客話長遠以來就淨講話毋使寫字，但係在臺灣這十過年來開始用漢字寫作，處理个方式當多係無準無則。有兜人講毋使照漢字形音義个規則，隨便擇一隻好寫好認个字公布出來就做得，有兜人又講用國語个漢字拿來讀客話就做得。這係全毋了解文字本質意義所講出來个閒話，像客話个「棉鼻公花」、「狗貼耳」，係講大家就採用國語个「馬櫻丹」、「魚腥草」來做客話，該客話个「棉鼻公花」、「狗貼耳」，加一代人落去就毋記得淨淨囉。
尤其，像「狗貼耳」這種藥草，從亻厓還細就講「狗點米」毋知字仰般寫，開始轉寫漢字，就不管厥个形音義，照等話音寫「狗點米」，到背尾正知愛寫「狗貼耳」正著、正有意義。原來祖先恁仔安名，係講葉仔像狗仔个耳公貼貼。毋故，做麼个「狗貼耳」會講「狗點米」呢？再過了解厥个讀音變化，原來係「貼耳」同化到「點米」个走音（diabˋ ngiˋ→diamˋ miˋ），這同「木耳」走音到「木米」道理共樣。但係「茶葉」安到「茶米」个道理又無共樣喔，「葉」變「米」，無走音个關係，完全係講茶葉曬燥吔，形仔像米粒个樣仔。可見愛借用漢字定著愛用漢字个形音義來尋厥變化个準則，正毋會鬥毋著空缺。下背再過整理出借用漢字个四隻準則，請學者專家指教。
第一則：借自家个讀音(做毋得借國語借學老話)。借漢字，愛借客家自家个漢字音，做毋得用國語音或者學老音个漢字。像「嗄……」个「嗄」借國語音ㄕㄚˋ轉過來讀sa ，這係毋著个借字，毋當借客家話个同音字「社射舍」儘採拿一隻sa字來用，就比面前該隻「嗄」，還較合用佢个用字道理。其他「逗熱鬧」愛「鬥鬧熱」正著；「米苔目」愛「米篩目」正著；「風搓」愛「風篩」正著。學老人用字乜共樣，「好康」愛「好空」正著；「等大人」愛「轉大人」正著。「勾勾纏」愛「糊糊纏」正著，總講有音無字，愛借自家个字音正做得。
第二則：借共類聲調个漢字(漢字有陰平陽平陰上陽上陰去陽去陰入陽入，愛一一對應)。像「喙」係去聲字，做毋得用上聲个「嘴」字，「嘴」係上聲字，做毋得用去聲个「喙」。讀「miˊ 國」就愛寫「美國」；讀「miˋ 國」就愛寫「米國」。讀「inˋ 人」就愛寫「應人」，做毋得寫「引人」；讀「en 喙」就愛寫「應喙」，做毋得寫「恩嘴」。這就係一隻漢字音，愛借用共調類个字來用。當然乜做毋得借國語用字意思同客話共樣，但係調類無共樣个字來用，像做毋得借「哭」來做「噭」；做毋得借「膏」來做「糊」；做毋得借「聊尞」來做「燎料」，全部就係聲調毋合。
第三則：聲韻接近(共一個發音部位共一個韻部)。像南部客講「bod ˋ 粄」，北部人講「fadˋ粄」，其實係共隻「發粄」个漢字；客家話个「客」讀hagˋ，同畲族人讀ha，音相近，其實共隻詞，原來係「山仔」个意思。zungˊ iongˊ（中央）同dungˊ ongˊ（中央），佢該係文讀同白讀个差別定定。學老話个「罪」讀zue，客話讀cui，國語讀zuiˋ，字音雖然音韻有兜仔差別，毋故照濁音變清音个規則來對，完全就合音个字。這點清楚表示，借用漢字毋知厥形音義个關係，絕對借毋著正確个漢字。
第四則：比對對應字(無共時代無共空間个用字)。像「豬哥」同「豬豭」，「羊哥」同「羊豭」，係講用來做種个豬仔同羊仔，goˊ（哥）gaˊ（豭）係無共時代个音，「哥」係現代音个借音字，「豭」係古字，表示「雄性做種」該種牲畜，比對起來看，goˊ 就係gaˊ（「哥」就係「豭」）。這種現象愛靠多看資料，正尋得出佢兜个真正關係同意義，這位就無愛講忒多。
總个來看借用漢字，最重要个係愛用自家个讀音來尋字，還過尋好用字，愛檢查聲調有共型無？再過正來比對聲韻，係毋係符合歷史語音變化个規則；最尾就愛看無共時代無共地方个各種用法，來比對出盡正確个客話用字。
