豆豉个故事
【文／范文芳／國立清華大學中國語文學系退休教授】
（海陸腔）
范文芳教授 聲檔 — 豆豉个故事
一 、從字形結構講起
1. 豆在甲骨文時代，係象形字，描畫炊煮食物之器，相對於鬲、鼎、鑊、釜、籩、鍋等字，都係祭祀時，使用之食器。
2. 豉字，係會意字，左片个豆，係鑊，正片个支係手持棍在鑊中調治醃製食物。
3. 客語豆豉，專指用鹽醃製黃豆或烏豆，係客家人慣習食用之菜色之一。
二、從字意演變來討論
1. 豆字當早就分古人借來用做菜蔬之名，曹植有煮豆燃豆萁之詩句，更早時，孔夫子自謙說「俎豆之事則嘗聞之」，俎豆係指祭祀時之禮器。
2. 禮器豆，借為食物豆，係六書中之假借，菽正係食物豆个本字。
3. 客語「豆豉」一詞，豆係假借，豉係會意，左片个豆，保留鼎鑊个原意。
4. 現代客語豆奶、豆油、豆腐、豆豉都係指用菽豆做成个食品。
三 、從字音个角度來看
1. 豆，《廣韻》 徒侯切，流攝去聲，侯韻定聲母，客語音｛teu｝陽去調，竹
客音｛teu33｝，苗屏客音｛teu55｝。
2. 豉，《廣韻》 是義切，止攝去聲，寘韻禪聲母，竹客音｛shi33｝，苗屏客音｛sii55｝，台福語音｛cii33｝，台華語音｛chii214｝。
四、從構詞个角度來看
1. 客語地豆、番豆，台福習稱土豆，華語稱花生。
2. 客語長豆，華語稱豇豆，台福語習稱豆仔。
3. 台客、台福通稱荷蘭豆，台華語習稱豌豆。
4. 豆豉，台華語音｛dou42 chii214｝，台福語稱醃豉仔，音｛im42ci24a42｝。台客語音｛teu33shi33/teu55sii55｝。
5. 台華語習稱醬油，台福、台客語都稱豆油。
6. 台華語稱豆漿，台福語、台客語都稱豆奶，有別於牛奶、羊奶、樹奶。
五、聯想
鑼鼓、豆豉兩個常用詞，豉、鼓字形當相近，字音、字義有盡大个差別，還有一隻字，係客家大姓「彭」，裡隻字个左片，同鑼鼓个鼓，有麼个相關？等下二擺，正來詳細參詳、討論。
