看海
【圖／李岳哲；文／邱一帆／國立中央大學客家語文暨社會科學學系客家研究博士班】
（四縣腔）邱一帆 聲檔 － 看海
記得該年兩儕共下去看海，層層疊疊个海浪對海心捲等來。浪花對海脣打起，散放在空中，日頭晟照，水花點點金金，在若个目珠肚項，你講這風景當靚，𠊎乜試著當靚，該央時分日頭打光个你。
𠊎既經毋記得，該央時个你生到仰般形？這張逆光个相片，分頭那毛遮著个面，乜無法度看真你个面容！𠊎單淨記得，你該分海水打溼个頭那毛，鹹鹹香香个味緒，跈等海風吹一路來，傳到吾个鼻公，流入吾个腦筋肚，深刻、封印在吾个腦殼裡背，毋多知仔過忒兩三十年。
𠊎還記得該條名安到lucky个狗仔，係跈你當多年个伴仔。lucky踏等海水飆一路來个神投，還清清楚楚留在這相片裡肚！總係，𠊎毋記得該央時佢係在該逐浪，抑係走分海浪逐，毋知你還記得無？
