先生同佛祖
【文、圖／鍾榮富／南臺科技大學應用英語系講座教授】
（四縣腔）
鍾榮富教授 聲檔 － 先生同佛祖
今下工作難尋，蓋多後生人想愛做先生。頭擺做先生个人大部分都因為家境困難，為了節省學費同食雜費，減輕家庭負擔。不論為了麼个情形，教書總係一種蓋特別个工作。特別係因為先生一个人愛面對一班學生仔，講課愛生動，內容愛實在，在嚴肅个過程中，難免愛插兜好謔个故事，或者講兜現實發生个事情，引起學習者个興趣。
先生最大个責任就係愛教好學生仔，毋會个愛教啊會，使毋得漏溝，每一个學生仔都愛教到會，「每一个都不能少」。不過，這純粹係教書个理想。現實生活中，這種理想往往無辦法達成。故所先生同佛祖完全共樣，心中總想「普渡眾生」。眾生者，每一个人个意思。佛祖个理想，就係愛去度世間每一个在紅塵打滾，受苦受難个人去到西方世界。但係佛祖最後發現著，佢乜無辦法度「眾生」，眼前就還有盡多人毋食齋，毋拜佛，毋念經。故所佢最後又講，「佛度有緣人」，佢正使得度有緣聽厥話个人。在教育上，「有緣个人」就係上課有在聽課个學生仔。換句話講，先生心中有愛心，有理想，盡量想去教會每一個學生仔。但係，後來發現實在無辦法每一個學生仔都教得會，總係有兜學生仔，不論仰仔教都毋會。該時先生毋好喪氣，毋好失意，當然也毋使放棄。這下就愛想著佛祖个話，先生正度「有在聽課个學生仔」。
毋止佛祖恁仰講，耶穌乜係恁仰講。聖經先有理想，愛「拯救世人」，「世人」就係世間个任何一个人，同佛祖講个「眾生」共樣，都係一種理想。基督教个牧師，心中盡有理想，行去世界各地區，去傳教，去救人。不過，於今世界上本本還有盡多人毋識上帝，毋上教堂，毋讀聖經。最後，聖經也講「信𠊎者永生」。平平係傳教，平平係上教堂，有人信，有人毋信，信个人正會得救。教育上來講，「信𠊎者」就係在教室認真聽課个學生仔，只有這兜學生仔會得救，正會分先生度去另外一岸。
人生短短，世事難料，有聽課同無聽課个學生仔各有不同个人生，各有不同个色彩，盡難講哪種色彩，哪種人生過好。故所先生愛有佛祖个度量，愛有耶穌个心胸，上課係本分，無需要要求每一個學生仔都愛聽課，都愛信先生講个話。
