客語結合校訂：細魔豆愛學校
【文、圖／葉金華／永和國小】
客語結合校訂細魔豆愛學校.mp3
「Mi Mi Re Do Do， Re Re Fa Mi Re Do， Sol Sol Fa Mi Mi ，Re Do Re Mi Do，靚靚个樹仔，靚靚个花草，靚靚个學校，學校盡生趣。」吾班項一年生个學生仔逐儕都當好唱這首歌，大家共下唱唱跳跳異生趣。
咦？你定著毋識聽過這首客家童謠！係呀！這歌詞係𠊎兜改編个喔！生活課本裡肚有一首歌仔國語安著「瞎子聽鈴」，係盧梭作曲个。𠊎從網路項尋資料，摎學生仔略略仔紹介，無想著該隻盡有名个思想家盧梭毋單淨會寫書，乜會彈琴做曲，佢死了幾十年了後還影響後來个法國大革命呢！有兜學生仔精砉砉仔1，轉去會摎屋下个阿爸阿姆分享。𠊎教學生仔唱歌跳舞，用手機仔錄影、傳到吾班項家長个Line群組，分佢兜了解細孲仔在學校學个部分內容，家長乜試著當有意思。
吾學校逐隻禮拜愛上一擺个校訂課程个主題係「神奇魔豆」，學生仔好比各式各樣个種仁樣仔，生來各各不相同，佢兜爆芽綻筍、開花結子个時節都無共樣，逐儕人都有無限發展个可能性。「水大好行船，人多好做事」，吾學年有幾隻先生會共下準備課程，利用放尞日寫教案，就為了分教學做得順順利利个進行，有成時教案還會刪改當多擺，盡工夫，在這隻年頭愛做好一个先生斯無恁該喔！
今這下戴在都市裡肚个細人仔，隻隻就像飼料雞共樣，罕得有機會接近大自然，當需要培養對環境个感受能力。吾學校當闊，識分人安做「綠寶石」，種有異多種个樹仔，會跈等四季變化：春季臺灣欒樹會開一大片淰黃色个花、幾頭高高个苦楝樹會打出淺淺个吊菜色帶有清雅香味个細花、像係著等白色新娘紗个流蘇花樹乜盡靚……。運動坪脣項有壯旺个榕樹、樟樹摎菩提樹做得抵日頭。尋時間渡學生仔去校園逛逛啊，順續仔認識該兜花花草草，毋係盡好？學生仔暢蹀蹀仔去校園觀察植物，摎收集个葉仔拿轉教室，同數學課用過个圖形附件共下做材料，發揮創意，在圖畫紙項貼出一隻靚靚个學校。
請學生仔在位仔項坐等、摎作品放在桌頂展覽，逐儕都有自家个藝術特色。全班六隻小組，逐組限定半分鐘到兩分鐘自由行動（表現較好个小組做得有較長个時間），輪流去欣賞其他同學个成果，堵著自家試著當靚个作品就用手指公摎佢个作者比隻「讚」，學生仔都試著異有興趣。
頭擺識聽過一句非洲諺語：「一儕人行得遽，毋過行毋遠；一群人行毋遽，毋過行得遠」。打幫你這兜同事，正會有恁多生趣个教學設計，教學正會多元又精采！
注釋：
精砉砉仔：音jinˊ guag guag eˋ；精明的樣子。
打幫：音 daˋ bongˊ；幸好，感謝。
