客家民間文學个工作坊
【文、圖／彭心怡／靜宜大學中國文學系助理教授】
（海陸腔）
彭心怡 聲檔 － 客家民間文學个工作坊
8月29號摎30號這兩日，台灣客家語文學會到中央大學个客家學院辦客家民間文學个工作坊，朝晨八點半，𠊎桌仔正搬出來，凳子吂坐燒，黏皮斯有人來前台報到，等毋掣愛上課哩。
前一駁仔，學會開放客家民間文學工作坊報名个時節，𠊎看著各行各業个人來報名，有人係退休个先生，有个係學生，還有人係開公司个，不少人寫个頭路看起來都摎客家無麼个關係，毋過全部个人對客家文化都盡有心，前面當像一團猛火燒等，客家文化个人才，將來毋驚會毋罅。
羅教授講口傳文學常下會傳毋著，比論講有一隻人講別儕毋「踏實」摎毋「惜福」，該隻分人講个試著當奇怪，佢明明斯會「跺石牯」摎「洗衣服」，仰般分恁樣講喏？現場大家斯笑到凳仔會貶轉來。徐教授摎黃教授分享多年个調查經驗，像渡細人樣當有耐心。第二日，陳教授尋著7儕較會講古个人發音，參加个人分組，一隻字一隻字摎該兜故事記錄下來，大家練習以後斯知民間文學个調查無恁該。分組个時節，陳教授還一間一間教室去看，斯係希望大家做得共下來為客家民間文學盡力摎培養做得做調查个人才。
客家民間故事消失个當遽，記錄這兜故事摎尋著會講古个人斯愛像鴨嫲嘴罔吮，盡量去問，盡量去做，正會有機會。
