大起大落个香茅油
【文、圖／彭欽清／國立政治大學退休教授】
（四縣腔）
彭欽清教授 聲檔 — 大起大落个香茅油
香茅 資料來源
講著種香茅、焗香茅油，歇在苗栗山項个𠊎這輩仔人怕無幾多儕無堵過。
公元1912年，臺北農業試驗所一個日本人，將一枝香茅筍對印尼爪哇島偷偷仔㘝轉臺灣來，交分當時在新竹州大湖郡開農場个岩元清種，種來盡成功，漸漸仔發展到歸隻仔苗栗地區。
自清朝到日本手仔，客人對焗腦个技術發展到盡好，焗腦个大體係客人。光復後樟腦業慢慢仔末忒，焗腦同焗香茅油个基本原理差毋多，已多人就在山項種兜仔香茅，焗香茅油來賣，加減賺一息仔錢好相添。
香茅寮內部 資料來源
印尼本旦係全世界外銷香茅油盡多个所在，第二次世界大戰煞，印尼爭取獨立，同殖民國荷蘭相㓾好久仔。1951年荷蘭人撤出印尼，歸下仔香茅油个產銷管理就冗忒，產量少加盡多。臺灣人拈著死雞仔，盡多人就相賽種，兩下半產量就變到世界第一，苗栗縣抾忒百分之八十，其中大湖又抾一半。
香茅油桶 資料來源
民國四、五十年該下仔，吾姆講，山項人㧡一擔香茅油出來賣，褲袋仔个錢就塞到桄桄，有人還歸疊仔袋在後袋，挑試漏出半截掞啊掞仔，正經係富罅罅仔，毋驚人會目赤。
吾爸同吾哥在縣有林个樟樹園挖有兩三分地仔來種番薯、番豆，尾項跈大家改種香茅。看人賺錢已該喢樣仔，自家試啊仔，正知無恁軟賺。香茅種種落去過後，愛挷草、剷草，等顧到大頭好割欸，就愛趕天時好煞煞割起來晒畀燥，正㧡到香茅寮焗，輒輒愛等當久正輪得著，下擺仔愛等到半夜，就愛在寮下過夜。香茅草有幼幼个毛，黏著圓身盡虐削。
吾姑歇在八燕坑尾，種有好闊仔个香茅，𠊎兄弟仔放尞會去山項做事，在厥屋下歇。暗晡頭去香茅寮洗身，水已燒，下擺仔看著大人傳草、燒火、踏炊仔試著真生趣。吾表哥講入炊到出炊愛八點鐘，火停毋得，盡緪襯。
瓶裝香茅油
香茅油價數恁好，糾紛乜多，苗栗地方人就成立香茅油產銷合作社來化解問題。劉闊才做理事長，吾爸做監事，做奉工个，吂知管理出問題，無幾多年，又因爭化學个香茅油出來，焗个油價數跌到覆覆，合作社就橫忒，害理監事揹一身債。𠊎盡記得法院來吾屋下封屋、箪笥、過豬仔該下，吾姆嚇到緊噭。
成時仔想著香茅油，還係會發痴驚。
