行過百年歲月个圓光禪寺
【文、圖∕徐貴榮∕國立中央大學客家語文暨社會科學學系兼任助理教授】
徐貴榮教授 聲檔 — 行過百年歲月个圓光禪寺（四縣腔）
中壢月眉里个圓光禪寺，自日本大正6（1917）年開山創立到這下，行過103年吔！係桃園地區有名个佛教聖地，毋單止第一任住持係客人，連到這下第五任住持全係客人。
圓光禪寺个開山祖師、第一任住持妙果法師，係中壢郡平鎮金雞湖人，俗名葉阿銘，清光緒10（1884）年出世，到民國52（1963）年過身，享壽80，戒臘51年。13歲厥爸就過身吔，過無幾年間，三個阿哥也一個一個仔離開人間，心肝艱苦，試着人生無常，18歲食齋，到大溪員樹林个齋明堂（今齋明寺）修行。幾經因緣，熟事福州鼓山湧泉寺來臺灣个覺力禪師，在明治44（1911）年，過海到湧泉寺聽覺力禪師講法，跈佢披剃出家，過一年，同振光老和尚受具足戒。後來有事情轉來臺灣，因緣際會又在觀音山凌雲禪寺熟事大湖个劉緝光先生，談講起佛寺个計畫。
過忒年，大正1（1912）年1月，劉緝光、吳定連兩儕邀請妙果法師到大湖汶水起建佛教道場。開工過後，佢過海去鼓山同厥師父覺力法師報告起寺經過，邀請師父來主持開山。就恁樣，大湖个法雲禪寺，在劉、吳兩隻家族出錢出力，覺力、妙果兩位法師弘法之下，在大正3年落成過後無幾年間，學佛風氣大勝，名山高僧、各地信眾，相賽來參拜進香，使得大湖法雲禪寺同基隆月眉山靈泉禪寺、臺北觀音山凌雲禪寺、高雄大岡山超峰寺，合講「日本時代臺灣佛教四大道場、四大法派。」
圓光禪寺原來係當地邱屋人打算愛起來修行个位所，有一日，邱阿興、邱葉梅妹兩公婆到法雲禪寺去參拜，試着建築當莊嚴，念佛之聲當好聽，心肝歡喜，就恭請妙果來中壢開山。妙果又請示覺力師父，得着師父个准可。邱屋捐地十過甲，銀圓七千零，在大正6（1917）年開始起建，三年後完成，當時安到「月眉山圓光寺」，擔任第一任住持（圖1）。因為鼓山湧泉寺傳个係佛教曹洞宗，一脈下來，法雲禪寺、圓光禪寺也係曹洞宗。圓光寺創立過後，妙果法師全力弘法，創辦「臺灣佛學院」，禮請慈航法師過海來臺擔任院長。毋過怕係因緣吂足，抑係時機吂熟，維持六隻月就暫停吔！毋過當時係無妙果法師打下个基礎，也無後來个圓光佛學院啊！
圖1 第一代住持妙果法師（2020.08.22翻印自《走過百年－圓光禪寺開山一百週年回顧展集錦》）頁18
民國52年，妙果法師過身，選出第二代住持能明法師。能明法師俗姓謝，苗栗公館人，到62年高齡85歲退休，選出第三代住持本明法師。本明法師係桃園本地人，俗姓葉，係妙果法師个高徒，擔任過獅頭山元光寺住持12年，毋過因為年紀大咧，做1年就堅持讓賢，選過如悟法師擔任第四代住持。如悟法師俗名蕭金榮，昭和13（1938）年在苗栗頭屋出世，14歲在法雲禪寺跈真源法師出家，讀過幾下間佛學院、香港能仁學院，學識、功力當深。
如悟法師63年擔任第四代住持過後，首先同原來个大殿拆忒，重新起過北方宮殿式个建築，莊嚴雄偉，加上庭園設計，景色非常个靚美。民國70年，繼續辦理僧伽教育，將「臺灣佛學院」改名安到「圓光佛學院」，擔任院長，開始第一屆招生。學生仔毋單止係本國人，還有從世界各地來个。到73年第二屆招生，分初級班、高級班、研究班，民國76年，成立「圓光佛學研究所」，變到國際性个佛教學院。其他還成立「財團法人圓光文教基金會」，同醫院合作到鄉下醫療義診，在西片析買地增設「圓光佛學院」校本部，起學寮宿舍，出版佛學書籍，舉辦佛學研討會發表論文、齋僧大會、普渡法會這兜，擴大辦學規模。
民國100年，如悟法師擔任圓光禪寺導師，選出第五代住持性尚法師。性尚法師民國55年在美濃个佛教家庭出世，民國90年，36歲時讀圓光佛學院大學部，跈本寺住持如悟法師披剃出家，46歲接住持。佢後生、用心、煞猛，當肯學習，繼續辦理佛學教育，海峽兩岸宗教論壇，106年辦理慶祝開山100週年紀念慶典，舉辦展覽、到大湖、鼓山尋根之旅，參加桃園市政府臺灣燈會、花草節這兜活動。
當多人老一輩个人怕還記得，頭擺中壢吂有圖書館以前，讀書人想愛考大學、高普特考，圓光禪寺環境清幽，花草清香。有石桌石凳，大樹遮陰，陣陣涼風，係讀書个好所在，當多人會來這位讀書。到這下，斗換星移，寒來暑往，毋多知仔，行過百零年歲月个圓光禪寺，培養當多佛學个人才，變到遠近有名个佛教聖地，還有當多人來這參拜遊尞。（圖2、3）
圖2、3 107年筆者帶領桃園客家事務局辦理个桃園客家知識學苑學員參訪圓光禪寺，該院法師紹介建寺沿革、弘法、佛教教育、普渡眾生工作。（2018.07.29攝）
「出家容易修行難，受戒容易守戒難」，相信圓光禪寺將來擴大佛學教育弘法，會同佛法匯集成一股清流，讓法燈做得燈燈相續，光明無限照耀，分眾生儕儕都清涼自在，離苦得樂，增加福慧安康。
（本文參考圓光禪寺編印个《走過百年－圓光禪寺開山一百週年回顧展集錦》、《圓光禪寺開山100週年紀念特刊》
