命中止有八合米 行遍天下不滿升
【文／何石松】
何石松教授 聲檔 — 命中止有八合米，行遍天下不滿升（海陸腔）
命中止有八合米，行遍天下不滿升，從表面認知介意思來看，係講一生人命中止有八合米糧，仰般也無辦法長到一升介米，斯像命帶入骨，刀嫲斧頭削毋㪐共樣。其實，這係正言若反，唱顛倒歌，希望刺激後生人愛增志，愛打拚，多做好事，毋好分衰運打橫，毋好分苦境困著，處處替人設想，天助自助人助，該就無一定會不滿升。
歷史上就有一個安到范丹介後生人，非常打拚做事，但是，還係苦到屙痢肚。聽講佢20歲該年，摎外背討轉來介米，愛捨到米缸肚去，實在真奇怪，明明帶轉來幾下升介米，該一升米介米缸，仰般都張毋會淰。無奈何，歇睏一下好咧！
范丹堵堵當想愛睡目，迷迷痴痴試著有一條老鼠來偷食米，佢目珠擘啊開，一下就摎老鼠捉著，愛摎佢擲死，無想著，老鼠煞煞就講：「范丹啊，你做毋得摎𠊎(亻厓)打死！」范丹一聽，啊，老鼠也會講話，就問：「該你仰愛來偷食𠊎(亻厓)介米呢？」老鼠就講：「係佛祖喊𠊎(亻厓)來食介，佢講你這生人賺幾多，食幾多，你命中止有八合米，仰般做也不滿升，所以多出來介，就愛摎你食忒啊！」范丹就問：「佛祖戴哪位？」老鼠講：「佛祖戴在天西無恁遠，愛經過七七四十九條河壩，愛翻過九九八十一座高山，受過八八六十四隻災難，正會到該西天啦！」
范丹仰般都想毋解，佢賺介米會不滿升？就決定愛單人獨馬，自家一儕去西天尋佛祖，問隻講究，仰會行遍天下不滿升？𠊎(亻厓)正毋信。范丹正經愛去尋佛祖囉，一個人壯志凌雲出鄉關，毋驚苦來毋驚難；日時毋驚日頭曬，暗時毋驚鬼來纏；行到目花又鼻黃，踉踉蹌蹌嗄橫在路邊漘。佢醒來時節，一個老阿伯兜等一碗糜分佢食，非常關心佢，仰般會橫在路邊漘啊？
老阿伯知著范丹愛去西天，就拜託范丹講：「𠊎(亻厓)有一個妹仔，十八歲還毋會講話，你摎𠊎(亻厓)問好無？」范丹答應好，繼續向前行，毋知經過幾多日仔，來到一間廟前，廟肚伯公知范丹愛去西天，也拜託范丹：「𠊎(亻厓)在這修煉千年咧，仰般還無辦法上天，你摎𠊎(亻厓)問一下佛祖，好無？」好心介范丹，當然就講好。嗄等又上路，行到一條大河壩，原來該就係通天河啊！河壩又闊又大，流水又深又急，仰般過呢？既然來到這，死乜愛過去，無想著一隻大團魚講愛背佢過去，團魚又拜託佢講：「𠊎(亻厓)修煉千年，還無辦法變龍，你摎𠊎(亻厓)問問仔好無？」
經過千辛萬苦介范丹，該載啊來到西天咧！不過，恁毋堵好，佛祖出國去尞咧，交代一位尊者，問范丹，尋佛祖做麼介？范丹講：「𠊎(亻厓)愛問自家介事情，還愛問別人介事情。」
尊者講：「人做毋得恁貪心，你愛問自家介事，無就問別人介事！做毋得問自家介事情，又愛問別儕介事情！」范丹聽著盡尷尬：𠊎(亻厓)一心來西天，就係愛問自家介事啊，不過，若係問自家介事，加下轉去路上仰般對佢兜交代？係問佢兜介事，𠊎(亻厓)自家介事又無問著，該毋係石灰掞路――打白行乜？范丹想去想轉：𠊎(亻厓)一生人都做好事、講好話、守信用，摎人𢯭手，常扯在該無火挼菜刀――暗幫別人，仰般今日可以大大方方介來幫助別人，嗄恁為難？哈！范丹啊范丹，當然愛問別人介事情正著啊！
突然之間，范丹感覺天寬地闊，一色青天，就摎尊者講：「𠊎(亻厓)愛問別人介事情！」尊者就對范丹講：「佛祖愛走介時節有交代，係講有人來問自家介事，摎佢講，佛祖麼介都毋知唷，係講愛問別人介事，佛祖已經寫好在壁頂，請佢自家看。」原來啊壁頂有四句話在該：
范丹好運在眼前，
石女遇夫口能言；
伯公貪財金滿屋，
一鼈三珠難上天。
范丹歡喜壢天行等轉，行到通天河，堵著該隻大團魚，就摎佢講無辦法上天介原因係：「一鼈三珠難上天。」團魚聽著非常歡喜講：「難怪啊，𠊎(亻厓)身上有避水珠，又有避火珠，還有避風珠，這斯能保護自家性命定，無辦法幫助別儕啊，難怪毋會上天。𠊎(亻厓)將這三隻寶珠全部送你好咧！」果然，該團魚一下就變龍上天去咧！
范丹拿等三隻寶珠轉到伯公下，將佛祖介話摎伯公講：「伯公貪財金滿屋。」伯公聽了後，就摎佢平時壙起來介金銀財寶，全部送分范丹。
范丹轉到老阿伯介禾埕背，恁堵好厥妹仔企在該，一看著范丹，就大聲頦該喊：「爸爸，范丹轉來咧！范丹轉來咧！」厥爸聽著奇怪，煞煞走出來，一看著范丹，當暢斯問：「佛祖仰般講？」范丹斯將「石女遇夫口能言」摎老阿伯講，老阿伯歡喜歕天，就將妹仔送分范丹做餔娘。范丹人財兩得，渡等餔娘，帶等珍珠錢財，慢慢仔行等轉，正經係――范丹好運在眼前。
命中止有八合米，行遍天下不滿升，范丹用佢介堅耐打拚，老實信用，處處為別人設想，重新註解這句話，該就係：命中哪止有八合米定定，行遍天下服務社會，更係淰盆淰缽，滿斗滿升；財丁兩旺，金玉滿堂啊！
※此處的「介」為大眾通用的「的」，同教育部訂的「个」之意
