自心書房
【文、圖∕薛常威∕國立中央大學客家語文暨社會科學學系在職專班碩士】
薛常威 聲檔 — 自心書房（海陸腔）
「自心書房」乜算係一間獨立書店，今年7月18正正式開始營業。這間書店，本來就係店主人姜小姐自小戴到大个老屋，斯在佢以前讀个中壢高中旁脣。姜小姐講佢本來斯當好看閒書，看書做得分佢當歡喜快樂，佢斯想著摎自家這間老屋重新整理做書店，雖然屋係自家个，毋使繳屋稅，裝潢、書架乜係自家親手來做，毋過乜花忒不少錢，佢講。
「自心」个意思係講，讀書，做得分人回轉到自家內心。這下个人，大家个生活當勞碌、當無閒，當少做得小可停下腳步，尞下。上背「自」，下背「心」，這兩隻字鬥起來堵好斯係休息个「息」這字，歇睏个意思。在這，人做得好好歇睏下。
書店一樓係放當多書个書架，還有當多位仔分人坐等，人客乜做得點一杯涼水、茶來啉，食兜點心，輕鬆自然个看書。二樓个房間就係駐店藝術家个工作室，三樓還有教人做瑜珈，舉辦藝文講座个教室。
「自心書房」个成立，斯係一種老屋翻新再過利用當好个例仔。毋係單淨恁樣形定，葉小姐還邀請異多後生人進駐到這空間，帶來新个元素，變到還較有人好來尞。
「自心書房」長透會辦兜文藝活動，最近一場係這隻9月4號拜五晚夜个：人係樣形學會講話个。歡迎大家來聽講，聽看看人个語言係仰般開始个。
