無合作个時鐘仔
【文、圖／張捷明／國立中央大學客家語文暨社會科學學系在職專班碩士】
時針摎分針，本來係好朋友，日日在圓形个運動坪走相逐。分針腳長長，三步腳就走到濛線，時針腳短短，任走就走毋贏分針，故所分針就緊來緊驕傲。分針講：你還濫喔！(亻厓)一日走二十四轉涼涼，你正捩著兩圈，還拔氣毋上頸，較細義兜仔嘿！蟻公毋好踏死喔！時針本旦毋插佢，自家mak_mak_e_（堅毅不懈）緊走。日仔一日一日過，分針見超過時針一圈就笑一擺。
第一圈笑一聲「噹」。
第二圈笑兩聲「噹噹」。
第三圈笑三聲「噹噹噹」。
每半圈又還愛加笑一下「～噹～」。
人講：「火愛人燒著，人愛人打落」，這一日，時針想：「(亻厓)愛較增志兜仔，走分分針看，莫分佢看衰。」時針開始煞猛逐，短短个腳，(足兼)到愛大步又愛大步。
第一日，分針走二十三轉，時針就走完兩圈，還緊～來緊遽。
第二日，分針走二十二轉，時針就走完兩圈，還緊～來緊遽。
第三日，分針走二十一轉，時針就走完兩圈，還緊～來緊遽。
從時針開始起腳逐分針起勢，時鐘个主人上班，就開始緊來緊奇怪。第一日，去到車頭天吂光，想愛坐車，公車司機吂上班。翻轉第二日去到車頭，雞吂啼狗吂吠，想愛坐車，公車司機吂䟘(足亢)床。到吔第三日，去到車頭，星仔橫橫，天河顯顯，想愛坐車，一個警察阿伯行過來，當關心个問佢講：「麼个先生，汝來車頭做麼个？」
佢應警察阿伯講：「噯！你講个係麼个話，來車頭毋就係愛坐車，(亻厓)愛坐車去上班啦！巡查先生，分(亻厓)相借問一下好無，仰般日仔緊來緊慢，六點鐘仔還像半夜？算來係哪所爭？」
警察阿伯也應佢講：「噯！汝講个又係麼个話，來車頭(亻厓)當然乜知係愛坐車，毋過，你星光半夜就dia′(逛)來車頭，算來係愛同司機先生蓋被，也係愛喊司機先生䟘(足亢)床屙尿？莫恁無冤大枉哪～人家被骨就毋知睡燒吂哩！請你先轉去睡加一覺目，愛加三點零鐘，正有頭枋車好坐。」
時鐘个主人，聽著無奈何，只好斡轉頭，噥噥噥噥緊行、緊想、緊講：「天年倒貶哩！天年倒貶哩！麼个六點鐘安到半夜話？改爽哩！改爽哩！……」。
轉到屋下，佢臥起頭那看時鐘仔。好恬恬，佢頭那一拍、腳脾一搭、皮鞋一蹬，就講：「唉哦～(亻厓)就知～原來係吾時鐘仔壞忒得斯。」
原來這央時，分針指到十二，時針指到六摎七个一半，時針還緊走緊笑講：「莫看(亻厓)細罔細，吾拳頭斯尖～膩膩喔，毋使加幾久，就換(亻厓)走分你逐、走到你跈無蹤毋著、走到你鼻騷毋著……」還「噹.噹..噹...」緊笑。
還吂笑煞，時鐘仔就分主人從壁上取下來，電池剝忒，準備上班該時節，順續拿去整。
這央時个時針同分針，因為佢兩儕無合作，鼓無扛等來打，知差咧，肅恬，啞狗無言，毋敢聲。
