中央大學電子報

現下還有民間文學無

【文／羅肇錦∕國立中央大學客家語文暨社會科學學系榮譽教授】

　　

　　民間文學在中國、在臺灣，一直就在民間流傳。無人用漢字寫成作品，也無人認為該做得安到文學。就恁樣，上一輩个人講分下一輩人个聽， 聽著个人又用厥个話，講分別人聽，傳等下去。故所這種民間口傳口所形成个文學安到「口傳文學」，也安到「口頭文學」。這種文學，(同)用一般个文字來表現个「俗文學」就無共樣。

　　就因爭係口傳口，無共樣个口，就會傳出無共樣个東西(像故事、神話、諺語、歌謠、令仔……等等)。結果，共一個故事，無共地方、無共時代，流傳到背尾， 就會有兜仔變化、有兜仔差別，這就係民間文學个第二特色「變異性」。

　　除忒口頭性、變異性以外，民間文學係毋知麼人寫个，無作者姓名，淨知哪流傳出來定定。也做得講係民間集體个創作，各地就有人去傳去講，你傳吾个、你傳(亻厓)傳、你講佢講，緊講緊變，緊傳緊多作者，這就係民間文學个第三特色「匿名性」(也係集體創作性)，同一般有名有姓个作家文學無共樣。

　　像一個「李文古故事」，梅縣該片講李文固係松口人，明末清初个秀才。還細時就精靈古怪，聰明好抓作人，尤其同厥叔同佢个細叔姆、先生、同學、搞伴仔之間，搣出一大堆个笑料。傳到臺灣，就改變好多仔个笑料，也共樣流傳下去，像梅縣袁祥宗所傳个李文固。係講李文固阿叔李二何，分明朝解職轉到梅縣，心肚不滿，就在厥拐棍仔項刻等：「用之則行，不用則藏，唯我與汝相賴」，李文固看吔偷偷仔也在拐棍仔項刻：「危而不恃，顛而不扶，愛汝有何作用？」李二何分侄仔諷刺了後，就將拐棍攉忒。這段故事臺灣个李文古笑科，因爭愛配合表演唱曲，較難表現，故所一般場合，就無拿來傳講，慢慢仔同梅縣就有差別，這就係民間文學个變異性，兩片就毋知作者係麼人，故所也有厥个匿名性，這故事係用講用唱來表現个，故所也係口頭性同表演性个民間文學。

　　這兜民間口傳口流傳下來，當豐富又有歷史傳承个文化之寶，對每一個族群來講，係傳承文化命脈个所在，也係代表族群本身特色文化个重點。尤其一個分人統治無自家語言自主性个族群，下二擺愛恢復自家語言文化，尋轉自家文化特色該下，就愛靠自家个民間文學所傳承下來个種種特色，去建立、去組成自主性个文化。像德國從法國統治當中獨立出來，就靠民間流傳个日耳曼語，傳承德國民間文化，脫離法國統治以後，也靠民間文學來重建自家个文化。其他像芬蘭脫離瑞士，乜係靠傳承芬蘭語言文化个民間文學，正有辦法尋轉自家个芬蘭文化。客家人一直就講別人个話，自家个語言文化慢慢仔就消失特咧。下二擺，乜愛靠客家民間文學所傳承个語言文化，來重建自家个文化特色。

　　毋過，文化生命拚毋贏時代進步，今晡日媒體網路進步忒遽，網路電視吂發達以前，自由講古傳分後代無記名个作品，抑係大家坐到涼樹下、禾埕肚，大人講分細人仔聽个東西，現下全無辦法傳承接續下來，大家一有閒就揇等電視、電腦、手機，無機會聽長輩个老古人言。該當然，祖先留下來个口頭文學在這代人就會斷層。下二擺係講還有流傳民間文學，可能伸著網路流傳个毋知作者个笑料同歌曲，抑係半打油詩等等个東西。其他祖先流傳下來个故事，像神話，抑係諺語感情、智識智慧，一抹煞會攉到淨淨，轉換到網路流行个俗文學定定。也就係講有歷史性傳承性个口頭作品，因爭無承傳个能量就會日漸日消失，留下來个係網路流行个俗文學，這兜有文字記載个東西，就毋係口傳文學咧，加上有作者有版權也無係集體創作，該就無變異性吔。

　　總講現代網路發達之下，客家民間文學係死路一條。