電話騙人
【圖／李岳哲；文／邱一帆／國立中央大學客家語文暨社會科學學系客家研究博士班】
（四縣腔）
邱一帆 聲檔 －電話騙人
電話，當會騙人！毋係，應該講電話該頭个人，當會騙人！輒常聽講邪邪術術个人，設機房、申請當多電話號碼，三不二時，打電話騙人！佢兜運用人性共同个弱點或者講性體，像係同情、驚嚇、貪財抑係貪色，騙人个心、拐人个財產。
電話，毋會騙人，係人在該騙人？毋著！係人假神假鬼、假肝假胗、假生假死、假漦假濞在該騙人！該兜心術毋正个人，良心早就分狗喫忒，應該講係該兜人早就無面無皮、無廉無恥、無魂無魄〈pagˋ〉，早就分鬼牽著，像係財鬼、色鬼、屙糟鬼、垃圾鬼，一路跈等，遊遊野野！毋過，佢兜實在厲害、確實有慶，專門騙這兜古琢、老實、善良个人！
電話，毋會騙人，也無想愛騙人！當初，發明電話、改良電話个人，定著希望電話，做得發揮正面个傳達、交通、交流、溝通个作用。像係危險緊急个時節，打電話分做得解除危機、減少危害个人；當久無轉屋，做得打通電話分屋下人，問安、報平安；當久無見面，做得打通電話分朋友，問好、講心事……，電話，正經還有當多當多正面个功能！
