企啊在山上
【文、圖／鍾榮富／南臺科技大學應用英語系講座教授】
（四縣腔）
鍾榮富教授 聲檔 － 企啊在山上
記得頭擺還細，跈等大人去牛尾山採藥材。牛尾山海拔920公尺，係大路關最高个山。大部份村民一生都無上去過，𠊎蓋幸運去了幾下擺。去个時節，歸朝晨都在爬崎，汗流脈落，偏偏藥草聽講都生啊在山頂高。路途上，大人無聊，𠊎等細人仔也毋敢喊苦，一路跈等間(佢等)个腳步，就恁仰爬到山頂。一到山頂，本想愛坐下來尞，嘎無想著山景恁靚，𠊎毋想坐下來，因為對山頂看啊下去，頭先行過个路，彎彎曲曲，又細又長，有花有果，乜有揚蝶仔飛來飛去，周圍有高大青幼个嫩葉，在風中搖來搖去，實在清涼又好看。該下無愐著好好停腳觀賞，正注意爬山蹶崎，一心向前衝。
在山頂鋤藥仔，乜愛尋尋覓覓，毋係有钁頭就改著。田野一大片，各樣樹種雜草都有，交叉分布，愛尋出有用个藥材，實在講還愛靠運氣。上了山，坐尞一下，大家就分散開來，四位各去尋有用个藥材。時間過了盡遽，都還毋前尋罅，日頭就會落山了。大家又無閒洎杈，匆忙將藥材分批分好，各人㧡一息，下山歸來。沿路暗摸胥疏，麼个都看毋著。路途中个好風好景，就恁仰失落了。
人生像爬山，從細開始爬，一路向前，這衝該衝，時間總係無縫，事情永遠做毋核，但係每日都毋知在做麼个。愛到退休時節，正使得講爬到了山頂，向前看，遠景不多，渺渺茫茫，向後看，坎坎坷坷，可能回想起來有起有落，不過當時無麼个感覺。今年，愛感謝天公个照顧，也愛感謝一路以來同𠊎𢯭手，扶持𠊎行過各種困難个好朋友，𠊎已經爬到屆滿退休个歲數，使得揮別企了四十年个講台，放心歸轉大路關，照顧自家个果園。回想過去个教書生活，對國中、高中、大學、研究所，就像爬牛尾山共樣，一步一步爬啊來，每一階段都毋知在無閒麼个，毋係準備上課个材料，就係愛應付種種个人事紛爭，完全無心緒品賞生活个本質，心中也毋辦法計畫未來，就像水中漂浮个浮菜，水波沖到哪，浮菜就飄到哪。
無想著，就恁仰也行到山頂了。如今企啊在山頂項，低頭看頭擺行个路，無大風無大雨，也毋麼个波浪，平平順順，就像平凡人過个平凡日仔，一點都無特色，無功無勞，但係腳跡旁个汗使得證明這一生有出過力。蘇東坡講「回首向來蕭瑟處，也無風雨也無晴」，實在係人生寫照。企啊在山頂，向前行就係山背了，遠遠看啊去，煙雲一大片，曚曚烏暗，看毋清楚。頭擺就聽人講過，牛尾山个山背，到位都係濃雲大霧，手伸出來都無辦法看清楚。全大路關還無人行去山背又再歸來个，故所山背到今還係神秘个所在。
