送神頭
【文、圖／彭欽清／國立政治大學退休教授】
（四縣腔）
彭欽清教授 聲檔 — 送神頭
民國三、四十年該下仔，臺灣人大體都係苦煎煎仔，略下仔有麼个病痛，僅可仔去挷兜青草仔來膏抑食，無就去求神託佛求藥籤、食香灰，無幾多儕會去分先生看，盡多就係食屋下肚生理人寄个藥包仔。
吾上屋有一個阿明伯姆，逐擺哪有毋鬆爽，就會來尋吾爸，講厥症頭，毋係頭那痛、肚屎痛，就係人懶𧊅𧊅仔，食毋落。吾爸就會掀開通書來看，同佢講係撞著神頭，愛送神頭正做得。吾爸就煞煞剪一隻人公仔分佢帶轉去，喊佢準備送神頭愛用著个東西，臨暗仔向某片析行幾多步邊仔，點香拜過後燒金同人公仔化忒。實在也已奇，第二日阿明伯姆打早就來承蒙吾爸，講佢正加盡多。
送神頭个位所大體係在暗晡頭較少人行个細路仔項，比將講在莊頭愛去國小个峎頂項啦，上圳溝个田脣路項啦。朝晨頭去學校，下擺仔會看著用舊碗裝等个淨飯，一粒鴨卵，過金熡。
該央時，大體人還係食番薯籤攞飯，一粒卵愛煎來歸家屋人傍飯，老人家驚細人仔淨知圖㘔定定，看著卵會去拈來食，毋知恁樣會犯著神頭，該就會費毋直，就再三叮嚀細人仔定著毋好恁毋知頭天。實在講，老人家係加愁个，莊項狗仔猛幾精，暗晡頭早就走去搶來食淨淨誒。成半擺仔較多人送神頭，狗仔食毋退恁多，正會留兜下來。
吾爸講：這兜神頭實際就係閒神，有盡多種，同野鬼共樣，遊遊野野搣衰人，時運低个人就會撞著，撞著無共樣个神頭就會有無共樣个症頭。𠊎記得阿明伯姆一年總會來吾屋下成十擺仔尋吾爸掀通書，症頭總係無共樣，總怕係犯著無共樣个神頭。
下後教育緊來緊普遍，經濟也緊來緊好，大體人有哪毋暢快，就會去分先生看，無就去拈藥仔食，無人再過去送該看毋著个神頭了。
無想著，毋知哪久嗄養成出一種看得著又難送个神頭來。這兜神頭毋係普通个閒神，係大神大佛級个東西喲。恁衰撞著，就愛開錢消災。愛送幾大伯个錢銀還愛看這神頭有幾大粒仔。聽講總統級个愛幾十億仔，部長級个抑係立法委員愛幾百萬仔到成億仔，地方級个幾十萬仔到幾千萬仔都有。
原在人撞著神頭，一碗飯，一粒卵，一副金香就送得走，這下係撞著神頭，會食睡毋落，無死也會溜忒一層皮，真等人畏喲！
