食水唸著水源頭
【文、圖／張捷明／國立中央大學客家語文暨社會科學學系在職專班碩士】
大概三、四十年前，在苗栗有一個書讀盡高个後生人，盡有出息。毋過，佢並無歡喜，逐日都心心念念一件事：厥姆呢？厥姆係麼人？今佢恁大矣，會賺錢矣，嗄毋知愛去哪賢孝厥姆。
有一日，街巷有人同佢講：「該啊，在南苗車頭，日日坐等手推車，分人𢱤(sungˋ)上𢱤下个乞食嫲阿戇妹，就係若姆啦！」後生人起勢毋信，毋過該儕人講到有手有腳，佢遽遽走轉去問畜佢大个阿爸。
厥爸正同佢講：「頭擺你還細，驚你嫌若姆係乞食嫲，毋敢同汝講，今你大矣，恁曉得恁賢孝，𠊎就放心矣。」
佢又遽遽走去街項，親身將一身鱸哥礙塞(ngai sai)个乞食阿姆揇轉去，親身摎阿姆身腳洗淨，日日奉養賢孝。『掄沉(lem dem)竹頭出好筍』，乞食嫲阿戇妹春光哩唷(lio′)！
下後，南苗車頭，就無人再看著該乞食嫲流浪街頭矣。地方人士就將這个故事傳開，拿來教示世細。
