中央大學電子報

中壢范屋成立范仲淹紀念館

【文、圖∕徐貴榮∕國立中央大學客家語文暨社會科學學系兼任助理教授】

　　中壢范屋原來在上三座屋62號，面向西北，本來係有門樓个三合院伙房屋，在民國106年拆忒起過新公廳，變到面向西南一座現代西洋式个兩層樓建築形式。地址也變到正光街225號。

　　范屋13世祖宏高公，在乾隆45（1780）年，一儕人從廣東惠州府陸豐縣吉康都崙嶺鄉黃護寨鯉魚山來台灣。過後大个倈仔俊琳公、第三个倈仔俊顯公也來到台灣，第二个倈仔俊揚公（素質）同阿姆黃氏留到老屋無來。子爺三儕來台過後，無落無著，包尾正尋到這上三座屋來開墾，耕田過日仔。

　　來台第二代兩個倈仔，俊林降開蘭、開保、開桂、開騰、開茂五个倈仔，俊顯公無降，由開桂過房分佢，鬥鬥等宏高公總下有17個孫仔。故所范屋人丁當旺，氣勢同當時个江姓、游姓人有拚，變到「上三座屋」个地方庄名。

　　

圖1 正身兩片个竹節窗，左櫺「起鳳」、右櫺「騰蛟」（2011.08.19攝）

　　

　　子孫為着感念祖先个恩德，在清朝咸豐年間，在這起一座「凹榻式」內通廊个伙房公廳，正身門頂對中貼等堂號「高平堂」，兩片竹節窗頂有窗櫺「起鳳」、「騰蛟」（圖1），柱頭頂項也有「交趾陶」。棟粱頂个剪黏雖然舊吔，看起來雕塑異精工，頭前有一隻門樓，門樓還有翹峨。（圖2）

　　

　　圖2 中壢上三座屋范屋原貌（2011.08.19攝）

　　公廳內肚，阿公婆牌頂高掛等一垤「隨會遺徽」个牌匾，表示祖先个來源同功勞。（圖3）左右各有三槓橫屋，正身同橫屋之間用通廊連接，廊頂有彩繪，大部分係教化抑係警世用个，歸座仔屋看起來異靜辦篤實，到今有百大零年个歷史吔！

　　

圖3 原來个阿公婆牌位、神位（左觀音菩薩、右義民爺）（2011.08.19攝）

　　

　　到日本時代，清丈土地，由俊林公所降个五大房傳下各選一儕人來做管理人，共同出名辦理所有權登記。後來在大正3（1924）年，用長房「開蘭」个名同政府申請登記，安到「范開蘭公祭祀公業」。到民國100年，根據政府頒佈祭祀公業條例，申請改名安到「祭祀公業法人桃園市范開蘭公」管理到這下。

　　公廳識在明治38（1905）年第一擺重修，第二擺重修在民國55年，都維持三合院个原來建築。因為高速公路做完成過後，面前分佢遮等，到106年第三擺經過委員會共同決議，拆忒三合院伙房屋，重新起過現代西洋式个兩層樓建築。（圖4）

圖4 范屋新公廳樣貌，前面龍片掛等「范仲淹紀念館」个牌仔，背後係高速公路（2019.03.04攝）

　　

　　為着愛傳揚先祖宋朝賢人范仲淹个事蹟，故所新起个公廳一樓中央保留歷代祖先牌位、神位，頂高本本掛等「隨會遺徽」个牌匾，留等棟梁下兩片个棟對以外，（圖5）二樓特別成立范仲淹紀念館，左片放范屋歷史、相片、范仲淹个資料、文物、書籍這兜；右片做會議室。在舊（2019）年辦理范仲淹生平事蹟數位化研討會，想愛透過前人个事蹟，講分後代子孫知，毋好毋記得祖先開發个艱苦，愛承先啟後，發揚光大。

圖5 新公廳个祖牌、神位、棟對（2020.07.16攝）

　　

　　本來面積當闊个伙房屋，四片有竻竹風圍圍等，規模當完整，在中壢傳統客家个建築項當少見着！無奈何高速公路起過後，重新起過，頭擺个老伙房屋就伸着在二樓壁頂、展示櫥肚看看啊咧！逐年春秋兩季祭祖，徙到各地个范姓後代子孫，到今大概有千零儕人，都會踴躍轉來祭拜。

　　（本文參考桃園縣政府文化局出版个「桃園民居」調查報告書（下冊）146頁，還愛感謝范姓宗親會前理事長范火昌先生提供个資料同口述）