有事鍾無豔 無事夏迎春
【文／何石松】
有事鍾無豔 無事夏迎春.mp3
有事鍾無豔，無事夏迎春，意思係講有事情介時節，就尋鍾無豔，喊佢去帶兵相㓾，愛㧡國家興亡介責任；無事情介時節，就去摎美女夏迎春飲酒作樂。這有處理事情無公平，懈怠正事，分配工作無適當介意思。但是，愛認清這隻現象在哪位也有，毋好去怨嘆，愛做正經介鍾無豔，一心愛做該做介事，就毋會怪怨佢有情無情，有請亻厓無請亻厓啊！
鍾無豔，原名安到鍾離春，佢係歷史上四大醜女之一。恁堵好，又係齊國無鹽該位人。唸來唸去，鹽鹽豔豔，嗄轉音變無豔，所以安到鍾無豔。
鍾無豔雖然媸，但是本等高強；夏迎春，生著當靚，但是有貌無才。兩儕都係戰國時期齊宣王面前介紅人，一個係正宮皇后，一個係妃子娘娘；一個係靠自家本等得來介，一個係外表分齊王迷著介；一個為大王處理國家大事，一個陪大王飲酒作樂。
聽講鍾無豔頭那像舂臼，目珠像水窟，手指又粗又長，骨節又大又烏，光頭落杓，大蛤蟆頦，鼻空向上天，皮膚烏𪐞𪐞，到了四十歲，還係無人愛，佢滿天下廣告出去講愛嫁，但是，歸莊都無人眼睇佢。
雖然恁樣，鍾無豔還係當有自信，認為該兜人老鼠目，無眼光。哈哈，無辦法做平民百姓介餔娘，該就來去做一國之君介皇后！佢就自家去見齊宣王講：「亻厓係齊國嫁毋出去介細妹仔，聽講大王聖德仁慈，希望能夠掌理後宮，大王係毋係能夠答應。」齊宣王當當在該飲酒作樂，大家聽著以後，全部哈哈大笑講：「這係天下等毋知見笑介細妹仔啊，佢正經有麼介才能係無？」
不過，齊宣王還係接見佢，問佢仰般會撞到金鑾寶殿來？鍾無豔詳詳細細講出這下齊國有當多危險。比論講：「亻厓俚漘頭有惡豺豺介秦國摎楚國，目金金想愛食亻厓俚，國內還擠擠秋一堆奸臣，毋立太子，毋關心公子，斯貪酒好色，萬一有麼介事故，仰結煞啦？社會毋安定，人才難出頭，國事毋煞猛，隨時都有危險，大王還開發方圓四十里介獵場，無想打拚，國家行衰運，你知無？」
齊宣王聽了以後正知差，正知無豔講介話，毋識聽人講啊，黏皮斯拆忒享受介樓台，撤忒所有介女子歌舞隊，退忒巴結奉承介大臣，挑選精兵良馬，招納忠賢志士，擇隻吉日良時，立太子，奉娘親，封無鹽為皇后，使得齊國民富國強。鍾無豔功勞實在大啊！
鍾無豔立了正宮以後，逐日為國事打拚，正經係文武全才，解決儘多外交問題，比論講：秦國派人拿等玉連環來，喊齊國解開，齊宣王認為這下國家強起來咧，麼介事情就喊鍾無豔去處理；自家去尋夏迎春摎。無想著燕國又派人送來一張蒲琴，喊齊國人來彈，彈得出就放過你，彈毋出馬上進兵攻打；宣王又喊鍾無豔去解決，自家又去尋夏迎春。過無幾久，趙國又派兵攻打齊國，又係鍾無豔去出兵，正經係「有事鍾無豔，無事夏迎春。」
※此處的「介」為大眾通用的「的」，同教育部訂的「个」之意
