菱潭街興創基地
【文、圖∕薛常威∕國立中央大學客家語文暨社會科學學系在職專班碩士】
菱潭街興創基地.m4a
「菱潭街興創基地」這下算大有名，外地人可能毋知，這位本來係火災燒過个舊市場。日本時代，在龍潭大池脣有當鬧熱个龍潭市場，當打爽1973年分大火燒忒，雖然2002年識改成「龍潭第一市場美食街」，無奈何做毋起來，嗄漸漸荒廢忒。
龍潭子弟張智宇大學个畢業設計就係在故鄉做調查，發現這位荒廢14年無人注意个老街路。2015年佢回轉故鄉，渡等當地个後生人共下打拚，希望做得再過看到頭擺个鬧熱光景，順續分後生人有隻創業个空間，「菱潭街興創基地」就恁樣形開始。
正開始當然乜會堵著當多困難，像老一輩个人笑佢毋知愛搣麼个，佢又愛尋在地个後生人肯參加佢个計畫，一開始當然無麼个人會相信佢會做得成。
客語文學家鍾肇政老先生就係龍潭人，張智宇在「鍾肇政文學生活園區」熟識該下文化局駐地專案个蔡濟民，兩儕人在辦「硬頸市集」開始，發現其實龍潭當地當多後生人當認真當煞猛。因為做生理个店面屋稅無恁便宜，後生人生理當難做成，兩儕人斯開始想摎這無人用个舊市場重新整理起來，分後生人做得用較便宜个屋稅贌來做生理。
漸漸仔，幾年下來，越來越多後生人來到這位開店做生理，舉辦逐項文化活動，「菱潭街」趁等緊來緊鬧熱，這下嗄變成龍潭新个觀光景點。
「菱潭街」張智宇个故事係講，後生人其實在學校讀書个時節就做得關心自家个故鄉，無定著哪日，哪位就發現做得大發展个機會。後生人發現機會就愛盡量來做，有做正有成功个可能。有想法，肯做，對故鄉正有貢獻，乜分自家有一隻成長、發展个機會。
