中央大學電子報

客家鵰阿啾箭

【文／羅肇錦∕國立中央大學客家語文暨社會科學學系榮譽教授】

　　台灣客家界流行用桐花來代表客家，這同中國長久以來用龍代表厥个神（圖騰）講自家係龍个傳人共樣，通體係硬尋一個大家就知係毋妥當个符號來做自家个代表，別人仰仔看法該就等佢去。這也同學老人強強愛用「台語」來代表學老話共樣，完全無將客家人、原住民看在眼內。這種做法就安到「敢死就贏人」，也做得講「先搶先贏」「先喊就變若个」。

　　照恁樣个不法規則，亻厓今晡日就來喊「客家鵰阿啾箭」。做麼个愛用阿啾箭來代表客家鵰？道理當簡單：

　　第一. 客家流行个童謠「阿啾箭」，大家都認同阿啾箭係客家个屋下人。童謠恁仔講：「阿啾箭，尾鉈鉈，無爺無哀跈叔婆。叔婆呢？掌牛咧。牛呢？賣忒咧。錢呢？討餔娘咧。餔娘呢？走忒咧。」亻厓毋知客家个世大人仰會拿恁淒涼恁困情个歌仔來分細人仔唱。流行到今，大家續毋記得歌詞个淒涼，還轉化到異生趣異好搞樣仔。做麼个會有這種轉化，亻厓想險怕係大家同阿啾箭看成自己屋下人，屋下人本來就有恁多淒涼同困情，一下換到講阿啾箭無爺無哀，講阿啾箭係叔婆畜大个，講阿啾箭賣牛仔正有錢討餔娘，講阿啾箭討欸餔娘還苦到畜毋起，背尾連餔娘也走忒咧。這一層層个悽苦，好在有阿啾箭在該承等，歌仔正有辦法唱下去。故所講阿啾箭係客家鵰，麼人敢反對？

　　第二. 阿啾箭就係掌牛哥仔，毋單只扌帣手掌牛，還愛同牛仔捉蟲帶路，客家人無撿半息工錢分佢，佢也毋會發譴，逐日共樣在牛仔圓身邊脣飛上飛下跳上跌落。故所講阿啾箭係客家鵰無人敢講第二句話。

　　第三. 阿啾箭為著保護雞子鵰子，敢同雞嫲共下摎鷂婆相啄，這對歇山上畜當多雞仔个客人來講，阿啾箭毋係客家鵰係麼个？

　　第四. 阿啾箭係孤獨浪人，一生人單打獨鬥見義勇為。你認真看耙田打草駕下，白鶴仔歸群歸群在个相爭泌背搶蟲仔，阿啾箭有就單隻飛去啄兩下仔，又飛轉來企在燥樹尾無就單支竹截頂項，一儕人孤孤栖栖看白鶴仔搶來搶去。割禾駕下乜共樣，戽桶一過，稈葇一擲，禾鷝仔白頭公相賽尋穀粒來啄，罕得看著阿啾箭在該鬥熱鬧，佢本本企在燥樹尾頂項，一儕人孤栖孤栖看禾鷝仔搶來搶去。阿啾箭个個性盡像客家人喜歡單打獨鬥見義勇為个孤獨浪人。故所阿啾箭係同客家人共故鄉培養出來个客家鵰。

　　第五. 阿啾箭一身烏，叫起來啾啾啾毋就嘎嘎嘎。「烏」古音a（像顱唸na，羅唸la），故所「阿啾」就係「烏鳩」，鳩（啾）係叫聲。「箭」係「剪卷」个近音字，因為阿啾箭个尾開杈像剪刀形，故所學名安到大尾卷。從這點來看阿啾箭安名有厥歷史變化，各時代各族群就知這種鵰仔，客家人先搶來做客家鵰係盡有價值个事情。

　　總講一句，阿啾箭係孤獨勇敢善良有格个鵰仔，生活環境又同客人恁相像，共下生活久欸，連性格也都差毋多。故所你講桐花做得代表客家花，亻厓就講阿啾箭做得代表客家鵰。