在無教堂个地方
【圖／李岳哲；文／邱一帆／國立中央大學客家語文暨社會科學學系客家研究博士班】
（四縣腔）
邱一帆 聲檔 － 在無教堂个地方
在無教堂个地方，愛像在純潔个教堂裡肚樣，聖母、上帝係一面淨俐个鏡仔，自家定著乜愛係一面淨俐个鏡仔，有日無夜，照出自家軟弱个、怨怪个、失志个心；在無教堂个地方，愛向自家个內心祈求，有一隻堅強个、痛惜个、盼望个心，來定疊自家遊遊野野、變鬼變怪个靈魂，就像在教堂裡肚樣，虔誠向慈悲个聖母、上帝祈求。
在無教堂个地方，定著愛在自家个心肝肚，起造一間神聖个教堂，就像在教堂裡肚樣，有良善个聖母、上帝，日日夜夜，指引自家个人生路。
在無教堂个地方，日日真心禮拜聖母、上帝，夜夜真心向聖母、上帝祈求，祈求自家做得行向一條有盼望、有自信、有淰淰痛惜个路項去。
