竹葉林
【文、圖／鍾榮富／南臺科技大學應用英語系講座教授】
（四縣腔）
鍾榮富教授 聲檔 － 竹葉林
「竹葉林」係今晡日屏東長治鄉个德協村。這個客人个庄頭名稱，帶有十分生趣个歷史，使得做一面社會个鏡仔，反映少數族群對於命名个無奈。頭擺德協開庄个時，聽講係康熙年間(太約十七世紀期間)。先賢對火燒庄開始開墾，漸漸開發到香園樹下(今香楊地區)，後來順等水圳來到德協地區。當時个德協，一片平洋，無山背無屻崗，水源豐足，最適合做田種禾仔，故所先民感覺盡滿意，認為係上天帶來个好地方。就恁呢歇了下來。
開墾時期，泥土多砂多石，因為大部分都係隘寮溪沖下來个河床，非常少泥肉，盡壞耕種。毋過，這兜對客人毋會困難，早期个開墾者，能夠開埤做圳，對「大坑闕」(今水門)引水下來。慢慢个，砂地變作良田，人口越來越多，水田緊來緊旺。早時，德協地區到位都係高天天个麻竹，又稠又密，每當夜暗時節，清風一吹，伊伊哀哀个竹仔聲，加上窸窸窣窣个竹葉聲，讓人感覺著又幽靜又得人驚。就因為全庄四周都係竹仔，故所分人安到「竹葉林」。
竹葉林隔壁歇等平埔族，屬於馬卡道族个分支，早期隸屬於鳳山州。搬入竹葉林隔壁以後，大部分歇啊在工寮樣仔个屋下，當地个客人將佢等安到「番仔寮」(今个繁華)。平埔族失去了自家个語言以後，改講學老話。番仔寮人口雖然毋係盡多，但係能人蓋多，在政府機關服務个人也毋會少，加上屏東地區个大環境係學老人過多，擁有相當程度个話語權。「竹葉」客話讀[zug iab]，但係河佬話讀[ded heu]。台灣光復以後，愛用華語來命名，問到「竹葉林」愛改麼个名，學老人講伊等讀[ded heu]，當時个官員就聽做「德協」，就恁仔早期个「竹葉林」今下安到「德協」。換句話講，竹葉林本本係客人个位所，應該愛用客話來命名正著，無想著由於社會經濟地位个關係，三鬥四毋著，嗄分人安到「德協」。
還好，竹葉林地區个後生人毋會丟核原來先民个命名，成立了「竹葉林文史工作室」，開始研究開庄个歷史，重建先賢頭擺行過个腳跡，想愛慢慢个回復客話為本个命名權利。如今，在三號國道个長治交流道下來，迎面就係「竹葉林麵店」、「竹葉林客家小食」等等招牌，可見竹葉林慢慢仔浮現在後生人个心中。
