大婆細姐之二
【文／薛常威／國立中央大學客家語文暨社會科學學系在職專班碩士生】
這段劇情是駙馬爺故鄉的元配妻子來京城找丈夫，公主並不知道駙馬爺已經在故鄉取過妻，結果引來爭奪大婆細姐的戰爭。一般是先結婚者為大，後取者為小，但是忌憚公主的身分地位，元配反而甘願做小。
公主：吂愛正，命還硬喔〜
俊生〜，駙馬爺，毋記得自家个身分係無？在後宮所在，摎一民个野女，揇等，成何體統呢？
俊生：公主，佢毋係野女，佢名喚白秀蓮。佢算將就係…
公主：係麼个？講啊，仰毋敢講呢？佢你麼儕？你毋講。
俊生：佢係𠊎个結髮妻子。
公主：啊哈，你在本宮面前承認，佢係你个元配妻。好，既然你就敢承認，加
人斯加福氣啦，係有白秀蓮到來，這事情就𠊎來安排。
俊生：斷真有影？公主妳真是寬宏大量。妳愛安排，斯請公主妳來安排。
公主：你就看𠊎仰般形安排囉。
公主：白秀蓮，命還硬喔，敢尋到後宮來。好，俊生這擺，毋單斯有官
好做，已經皇家在內，東床駙馬爺地位。白秀蓮，千里路頭為麼个？斯為著金錢兩字。來來來，本宮在此，手拿五百兩銀，買斷妳夫妻感情，妳轉去開種賣菜，永永遠遠不准倒轉來。摎𠊎走。
秀蓮：且慢，公主。妳个話𠊎聽得清清楚楚，也毋過公主妳愛想清楚。𠊎摎俊
生係恩愛个夫妻，今天俊生分妳招做東床駙馬爺，妳也大大公主个地位，𠊎秀蓮不過平民百姓地位，毋敢摎妳相搶。
也毋過𠊎摎俊生盡恩愛，感情好，妳也知𠊎千里路頭來到，就係為著佢。𠊎無愛麼个名分，妳係公主，大婆分妳做，𠊎甘願為小，只要公主妳莫逐𠊎秀蓮離開啊。
公主：大婆讓𠊎，妳甘願做小。白秀蓮，喲〜該毋係妳摎𠊎公家老公，野雞也
愛配鳳凰。俊生，你有看到無？白秀蓮根本不識抬舉，拿了五百兩銀，佢毋領受，這事情愛仰般形判啊？
公主：吂愛正，黃俊生，你這下講麼个呀？在後宮所在，白秀蓮，回轉故鄉
前去，喔〜你夫妻恁多情，枉費本宮此款對你，既然你若恁樣形，愛選佢白秀蓮，自尋死路啦。當初時節，你瞞君騙臣，愛死係呀？毋使驚無鬼好做，跈𠊎金殿來去。
公主：來去。
唉喲，𠊎話著麼儕？皇兄，你看啦，佢兩公婆欺負𠊎啦。
太子：哈哈，妳啊，莫欺負人斯盡好了，講佢兩公婆欺負妳。
公主：唉喲，內打出。
太子：麼个內打出。
公主：該手指伸出來斯有拗往內，無人靠往出，你係𠊎哥，𠊎係你老妹，你仰
會講話全為佢呢？
太子：𠊎毋係為佢喔，𠊎係照公當喔。
公主：愛照公當做得，阿哥，這事情愛照本宮來判。黃俊生，愛分佢死。
太子：就愛分佢死？
公主：當然愛分佢死啊。
太子：死忒，妳做寡婦。
公主：甘願，𠊎無佢乜無啊。
太子：恁呢好，既然係恁呢講。妳呀，皇城外所在，摎佢打到昏昏死死。
公主：唉喲，皇兄，麼儕打个你知無？
太子：𠊎仰會毋知呢，該就妳喊人打个。
公主：仰會𠊎做个事情你全知？
太子：該白秀蓮𠊎救个，𠊎仰會毋知？
公主：還會哪，你試看下了。𠊎哥呢？你愛牽細妹仔分你老妹婿喔。
太子：該佢餔娘乜〜該妳毋係，妳後來个乜。
公主：無愛了啦。看你个面子，佢講愛做細姐，𠊎做大啊？
太子：有影吼，正經个？等下，人講先得先，後得後，這次序毋會亂，妳甘願
公家老公，行前去，喊佢阿姐。
公主：蛤？𠊎公主呢？喊𠊎做細姐哇。
太子：這下無共樣了啊，頭下係妳做大姐，這下係佢做大姐。
揇：nam31；摟抱。
加人斯加福氣；多人多福氣。
野雞也愛配鳳凰；嘲笑身分低的人想要高攀。
愛死毋使驚無鬼好做；要死不怕沒機會。
內打出；偏心照顧外人。
公當：gung24dong55；公平正直，不偏私。
昏昏死死：fun24fun24xi31xi31；昏迷的意思。
牽：kien24；搓合。在這裡是如「牽」豬哥kien24zu24go24的貶抑用法。
先得先，後得後；先來後到，照順序。
