政大客家社
【文、圖／彭欽清／國立政治大學退休教授】
（四縣腔）
彭欽清教授 聲檔 — 政大客家社
政大客家社創刊號內頁照片
亻厓在政大教書該下，總想愛成立客家社。民國85年底，認識成十個民族系个客家同學，同佢這兜講起吾「妄想」，大家就興嘟嘟仔。這兜後生仔當煞，跈等就同學校申請，亻厓做社團指導先生。課外活動組个主辦先生係竹東人，用急件來送申請書，無幾久仔就核准成立。
續下來就係開籌備會同招募社員，兩下半就招著二十大零儕，除忒民族系个以外，還有政治、中文、社會、企管、財管這兜系个同學。擎頭个係民族系个徐啟智，生來生理腳，自家駛一輛貨車做生理，用電腦同人定飯包，還賣冰檸檬紅茶。
這兜後生人心肝已雄，講定翻轉年3月19正式成立（堵堵堵著吾生日，學生仔講係挑試選這日个）。該日愛辦政大客家日个大活動，有客家美食、客家子弟班、客家歌謠、三腳採茶，歸日仔就有活動。場地係行政大樓面前个廣場。
恁大棚个頭路，下下愛錢：宣傳單、客家日个旗仔，搭戲棚、攤仔位、請人煮食、表演。好得寒假起勢學生仔同亻厓就陸陸續續有去寶島客家電臺同鄉親報告這項活動，當多熱心个鄉親聽著後生人肯行出來，就相賽捐錢，無就半相送仔贊助活動。啟智就駛等貨車去收錢抑係載活動愛用著个東西。
民國86年3月19 該朝晨政大客家日開幕，請鄭丁旺校長講話，佢講佢係臺南東山鄉个客人，毋過厥爸手仔就無麼个會講客誒，佢希望做得對客家社這拈幾句仔客話轉來。盡多客家同事乜相賽來認親，總教官林將軍講佢係美濃搬去臺東个客人。
盡承蒙臺北地區鄉親个支持，出錢出力，還到現場來增光榮，對朝晨到臨暗，人客來無停。毋過，在行政大樓對面个教室上課个先生同學生仔摎學校反應，講吵到無法度好上課，下後學校就規定上課期間，行政大樓面前做毋得做戲唱歌仔。
政大客家社个同學正經當肯做，跈等就在學校開基礎客話課，分想學客話个同學來學。下後，政大實驗小學過萬興國小乜尋佢這兜教。還同臺大、師大、文化个客家社辦研習營。有一年去臺北市公訓中心帶少年客家營。也辦社刊《指南客談》，封面个題字還係請鍾老寫个。
客家社團辦來恁好，逐年學校社團評鑑就係優等。亻厓89年退休，還有兼課，見客家社有活動會盡量去參加同贊助。下後，聽講社員無麼个好招就停忒，實在已打爽。
政大客家社社刊封面照片
