芽苞過冬
文、圖／張捷明
國立中央大學客家語文暨社會科學學系在職專班碩士
二十四節氣，秋分、寒露、霜降迮迮(zagˋzagˋ)到，地球向北側走一片，日頭斜到遠遠南方。
立冬、小雪、大雪再輪等來，霜雪摎山換銀裝，本旦青色个樹葉仔，一皮一皮相賽（coi）離開摎春風約會个樹尾，走到地泥下囥，留下孤淒个樹梗（guang‵），在灰色个天頂搖搖當當。
寒風中一粒芽苞，帶等千世萬世累積个智慧，恬恬仔隱身樹皮下，在該吸收日月精華，看歷史循環。
佢身上保存祖傳DNA機關，厥生命風采，將會從某一隻點開始又風起雲湧，分自家承擔傳承个任務，分別人讚嘆宇宙个變化。
寒風還在該吹，芽苞冥想無時恬。佢回想，一代一代經過幾多擺物競天擇，生命正能傳到這下；佢深知，毋好踏差寒熱腳步，正能完成生命任務。
寒風還係無時停个吹，兩子阿公行在樹下過。孫仔講：「無枝無葉燥兮兮。」阿公講：「佢係在該修練，等待春天來臨个時機。」
冬至、小寒、大寒，風還係不停吹。毋過，春天既經漸漸到，芽苞乜緊來緊有智慧，佢既經準備好，愛做迎春第一枝。
