楊梅白蛇廟全國唯一
【文、圖∕徐貴榮∕國立中央大學客家語文暨社會科學學系兼任助理教授】
徐貴榮教授 聲檔 — 楊梅白蛇廟全國唯一（四縣腔）
楊梅愛去新屋个楊新路二段290號路脣項，有一間「白蛇廟」，廟兩側个柱聯寫等「白陽人間只一廟 蛇男下凡渡世人」，廟門對聯「瑤台恩賜道氣鎮楊梅 白蛇顯靈丹頂佑百姓」，係全國唯一个白蛇廟。（圖1）
圖1 楊梅楊新路上个白蛇廟（20200623攝）
白蛇廟主神服祀「白娘娘」，「白娘娘」就係民間故事白蛇傳个女主角白素貞。到底楊梅仰會有這間廟呢？起這間廟个創辦人羅欽師先生表示，佢本來係做倉儲物流个，無麼个特殊信仰。民國79（1990）年个時節，從馬來西亞轉來臺灣創業。二十八年前，也就係民國81（1992）年，有一個朋友愛去南洋，搭佢畜一尾南蛇變種个「白蛇嫲」。畜一站仔過後，厥朋友也無倒轉來拿轉去，顛倒試着白蛇異有靈性，像有一隻暗力偷偷仔在該(扌帣)手，帶分佢一家平安，事業越做越順序，堵着困難，逐擺都做得逢凶化吉，對這尾白蛇越來越有感情，就緊畜等下去。
到感情深吔！將心此心，想着這條蛇嫲當孤栖，就想辦法愛尋一尾蛇公來分佢配對，包尾有一個朋友在高雄甲仙帶一尾白蛇公來，共組白蛇家庭。白蛇嫲從該下就開始孵白蛇子咧！後來孵到十過尾。聽講有神明來托夢，這白蛇係白素貞个化身。後來又識有幾個仔當有法眼个人、和尚仔同羅欽師講，這白蛇係白娘娘个化身。羅欽師就同厥好朋友劉東隆先生參詳，共下出錢。在白娘娘个指示下，同一間收忒个電子公司舊廠贌來起廟，在民國91（2002）年6月落成。當時白蛇廟登龕安座，來參拜个信眾歸路仔塞淰淰，差毋多有兩公里恁遠，鬧熱煎煎。
聽講白素貞識拜瑤台老母个師仔蕊芝仙子為師，後來同許仙相戀，容毋落法海和尚人妖共下个觀念，同法海和尚仔鬥法失敗，畀壓到雷峰塔下背，後來變到瑤台老母个坐騎，長年服祀老母，跈老母度化眾生救人。故所，白蛇廟屬於瑤台老母系統。廟肚除忒服祀白娘娘以外，還請來瑤台老母做鎮殿神，廟肚个眾神還有三清道祖、觀世音菩薩、關聖帝君、天上聖母、張天師、梨山老母、地母娘、九天玄女這兜。（圖2）
圖2 白蛇廟內眾神，中上係瑤台老母，中係白娘娘。（20200623攝）
逐年到五月節，白蛇嫲都會生卵，到七娘生个時節，會孵出細白蛇哥來。當多媒體聽着這兜傳奇个事情，逐年五月節就會帶等翕相機、攝影機來掌等，翕白蛇生卵个鏡頭。聽講還有天背無恁遠在日本來个，希望迎接細白蛇轉日本分信眾參拜唷！
這間白蛇廟有三寶，第一寶係白娘娘个小使仔「小白龍」，請廟項人員掛到身項，求白娘娘加持保佑身體健康，財運亨通。也做得用神尊作背景自家翕，請神尊神光普照自家个元辰光彩。第二寶係廟肚有世界最大个「天道易經羅經盤」，這羅經盤係彭暐榮先生所設計，直徑152公分，求个人愛報出姓名、出生年月日、住址，雙手合十，順時鐘个方向行三圈，調整磁場，求各方位元神保佑。第三寶係當重个大天然白水晶「白娘娘龍珠」，做得用雙手感應厥磁場，接收宇宙能量，補充元氣。聽講當多人聽着恁新奇，䟓工走來體驗試看啊！（圖3）
圖3 當重當大个天然白水晶白娘娘龍珠 （20200623攝）
因為白蛇傳裡背青蛇係白蛇个小使仔，平常時也歡迎畜青蛇个蛇主帶等青蛇來交流。白蛇也安到「白龍」，係財神个象徵，有香客會來求財運。白素真、許仙堅貞个愛情故事感動人，也有民眾來求姻緣。還有傳說白素貞同許仙識開過中醫藥店、行醫，信眾會來求健康。
逐年五月節，係白娘娘个生日，白蛇廟都會辦理盛大个祭典，邀請各地畜白蛇个蛇主，帶等白蛇來聚會，安排同白蛇合影、摸白蛇、認畜白蛇，贈送香包。香客除忒求財以外，也有男女前來求姻緣，廟項提供脫皮个白蛇「龍皮」拿轉屋下去服祀，求健康、闔家平安。有兜信眾會同白蛇掛到身項上求好運。今（2020）年堵着新冠氣炎（武漢肺炎、COVID-19）大流行，當日廟項除忒無分信眾掛白蛇以外，往年舉辦个祈安禮斗法會、立竳卵比賽、送香包照常，還加辦禳瘟法會，祈求疫情早日解除，民眾康康健健。
白蛇廟到這下嗄變到地方項特別个信仰，別位个人試着當好奇，也當遠走來，變到一個觀光頓腳个地方。蛇公蛇嫲、蛇子蛇孫，子孫滿堂，廟項畜有三百零尾白蛇！白蛇娘子白素貞，在西湖斷橋脣同許仙相堵頭，落雨借遮仔，連出一段又悲哀又靚美个愛情。這恁樣个人蛇之戀，雖然在當時毋融合世間，毋過一溜裡來感動人心，流傳千年个白蛇傳故事，又在楊梅這間白蛇廟，年年想着白娘娘白素貞，感動人間个人。（圖4）
圖4 白蛇廟肚畜个蛇子蛇孫，子孫滿堂。（20200623攝）
