竹籃打水上山峰 一場歡喜一場空
文／何石松
竹籃打水上山峰，一場歡喜一場空，意思係講用竹籃張水，從山腳下行到山頂，不管係用㧡，抑係用擐介，結果都係一場歡喜一場空。這係一種樂觀介想法，四方八面都能顧著介圓滿觀念，可以分吾俚頭腦更加活潑靈通。
人人都知，竹籃㧡水無採工，係講用竹籃來㧡水，斯像高山頂上捉鰗鰍共樣，用力多，收成少，無該人工介價值。竹籃打水上山峰，到尾來總係一場空。這係從愛得著水介角度來講，無得著水，所以係一場空。係講從另隻角度來看，怕有無共樣介想法。
有一個細人仔，厥爸總係喊佢讀書，佢試著讀恁多書有麼介用，讀了又乜毋記得，無意無思。厥爸就拿一隻張過石炭介籃仔分佢，喊佢去河壩擐水到屋下來，擐到幾輪以後，就問厥倈仔講：「你看該籃仔有麼介無共樣無？」倈仔看一下竹籃仔，發覺著原來恁鏖糟介竹籃，張咧幾下到水，又擐上擐下以後，竹籃已經變到非常萋頭淨利咧！喔，竹籃打水，毋係一場空定定，竹籃會變到淨利有用，像新介共樣，原來，讀書就像竹籃打水，看起來無麼介用，實際上，係一件歡喜介事情啊！
有個安著趙豐介人，一心修煉，想愛成佛，拜過盡多師傅，也無成功。後來，堵著一隻老師傅，老師傅看佢恁誠心，就拿兩隻竹籃仔分佢，講：「這兩隻竹籃仔拿轉去，逐日朝晨到山腳下去打水上山，愛專心，毋好想空想缺，看哪日能夠練到兩籃淰淰介水上山，該就修煉成咧。」趙豐當歡喜，就照等師傅介話去做。
一下開始，兩隻籃仔介水，仰般都無法度張淰，三年過去咧，佢介雜念正慢慢清忒，籃仔張介水也越來越多，佢介心肝也越來越大，一心斯想成仙成佛，所有介事情全部摎佢放忒，非常專心介愛摎竹籃仔介水張淰。練到第九年介時節，看等竹籃介水就會淰咧，心肝肚當歡喜。
一日朝晨，趙豐又去打水，看著水井漘一個餔娘人在該盡命牯打細人仔，細人仔分佢打到噦喤煞天，噭襤溼褸，該婦人家還毋放過佢，趙豐雖然看著，焗著外外，像人無看著共樣，一點同情心也無，佢斯一心想愛成佛，擐等水就走。無想著，一到山頂廟門口，兩隻籃仔介水嘩啦一聲，嗄漏淨淨咧！佢煞煞又去擐，但係一到廟門口，又漏淨淨，連續幾下擺，都係恁樣形，搣到佢腰鉗背吊，氣車氣急，歸身軟怠怠仔。帶等噭眵面去看師傅，講：「(亻厓)修煉恁多年，非常專心，全無雜念，竹籃介水也淰淰，仰般最尾，水還係打毋起來？」
師傅講：「出家人啊，慈悲為本，喊你消除雜念，毋係喊你掉忒善良介心，細人仔分人打到恁衰過，你全無感受，一心斯想著自家愛成佛，可見你全無善心，竹籃打水一場空，(亻厓)也無辦法啊！」
原來，竹籃打水，到底係歡喜，也係空，不在竹籃，係在各人介用心啊！
附註
鏖糟：骯髒。語見
元．陶宗儀撰《南村輟耕錄》卷十：「俗語以不潔為鏖糟。」
明．馮夢龍纂輯《醒世恆言．第十七卷 張孝基陳留認舅》：「今日這浴，就如脫皮退殼，身上鏖糟，足足洗了半缸。」」
※此處的「介」為大眾通用的「的」，同教育部訂的「个」之意
何石松 聲檔 — 竹籃打水上山峰 一場歡喜一場空（海陸腔）
