新北市客語輔導團演講心得
【文、圖∕周鈺凱∕國立中央大學客家語文暨社會科學學系客家語文碩士班】
Your browser does not support the audio element.
周鈺凱 聲檔 — 新北市客語輔導團分享心得（四縣腔）
筆者(前排右三)與輔導團老師全體合照
「各位先生大家好，(亻厓)係周鈺凱，今晡日當歡喜有這隻機會來這同各位先生做分享。(亻厓)這下係中央大學客家語文研究所二年生个學生仔……。」恁簡單个幾句話，(亻厓)在講个時節身體都在顫，做麼會恁仔呢？除忒因為係用客話講以外，還係因為聽眾都係客語先生！
上隻月(亻厓)受著維凱先生个邀請，去摎新北市客語輔導團个先生分享學客話个經驗。一開始聽著維凱先生摎(亻厓)講這隻事情，(亻厓)實在認為自家無辦法，除忒無麼个經驗好摎人分享，還過愛講分客語先生聽，實在係班門弄斧。毋過維凱先生一直鼓勵(亻厓)，經過歸日个考慮，(亻厓)試著這乜係一隻逼自家成長个機會，就答應先生咧！這期間還發生一隻事情，就係維凱先生第一擺打分(亻厓)講這隻事情个時節講：「主持輔導團个校長講佢想愛自家打電話邀請你，佢試著恁仔較有誠意。」(亻厓)聽著著驚一下，遽遽摎先生講毋使麻煩校長，先分(亻厓)考慮一下。雖然先生答應分(亻厓)考慮，毋過(亻厓)還係當驚校長會直接打電話來，歸日都當緊張。暗晡頭(亻厓)答應先生去做分享个時節，還特別請先生摎校長講毋使打分(亻厓)咧！先生正講校長愛打電話分(亻厓)个事情係佢開玩笑个，校長無恁仔講過。阿姆哀啊！先生毋好恁仔嚇學生仔啊！
在準備个過程，(亻厓)當愁慮內容對輔導團个先生無幫助，維凱先生就摎(亻厓)講：「無一定愛講麼个當特別个經驗抑係方法，你就照實講係仰般學客話个，聽眾有幾多收穫愛看佢兜有幾多體會，毋使愁麼个內容正對聽眾有幫助。」聽著先生恁仔講分(亻厓)壓力減輕異多，乜分(亻厓)認真去思考自家學客話个方法、環境。毋過，毋管用麼个方法、有麼个環境，最重要个還係自家愛多講、多聽，這雖然係老生常談，但係做任何事情都係共樣个道理，愛先摎基本功練好，正有更加進步个空間。
最尾，愛摎大家分享一句話：「To have another language is to possess a second soul.」意思係講：學習無共樣个語言，做得帶分(亻厓)等無共樣个價值觀同思考方式，親像有無共樣个靈魂。在這個在地全球化个時代，多學一種本土語言，毋單淨分涯等另一個靈魂，無定著有一日乜做得企項國際舞臺哦！
圖左為新北市客語輔導團召集人李顯鎮校長
