客家阿姆个乳菇
【文、圖∕練錫魁∕國立中央大學客家語文暨社會科學學系客家語文碩士班】
練錫魁 聲檔 — 客家阿母个乳菇（四縣腔）
外甥女做阿姆了，在網路頂傳幾張阿姆飼乳个相片，下背標明：現代阿姆真敢在大庭廣眾下，攎衫解帶餵自家个細人仔。
(亻厓)講：民國20零年左右，你个「姐婆大」歇在苗栗山邊，大伙房種茶維生，自家人加長工食嘴100儕。該央時茶產業既經進入衰落期，毋過還係愛做，姐婆摎幾隻姨婆輪等灶下事。姐婆太生个圓滾滾仔，講白滴仔：大嫲牯箍！當然盡驚熱。
熱天，天熱到佢無結無煞，在翕熱又烏疏疏个灶下煮食，係熱到打赤膊背等細人拼事就赴毋掣了，哪毋驚人會笑。
姐婆太兩隻乳菇早就分細人仔又吮又捋到像布袋共樣，駝到肚臍頂。細人仔肚飢時節，佢將乳菇拂到後背分細人仔吮，細人仔食飽了，肩頭一顫乳菇就從後背跌轉頭前，成時無閒到細人仔睡忒了，乳菇自動溜啊下來，碰到熱鑊仔个邊脣＂嘰＂一聲，阿姆哀！熝著了。做客家阿姆無時間喊痛乜無時間掩等遮等，這係聽(亻厓)姆講个。
茶米產業畜毋起大伙房嘴孔，分家後20零年(亻厓)正出世，等吾爸過身轉苗栗歇了半年正真經有看著！
入夜時節，阿婆兜等面盆水坐在禾埕邊，赤膊抹身體抹到奶菇下就將奶菇拂到後背，抹好後肩頭一顫，乳菇又溜轉頭前，(亻厓)斯看到嘴勺勺个！阿婆摎(亻厓)講(亻厓)爸食到九歲正斷乳；莫怪(亻厓)爸身體恁砸。
(亻厓)姆个乳菇就無像阿婆个布袋乳了，顛倒厥乳菇當細粒薄薄仔；毋過乳水當足！佢嗄畜比阿婆還較多个細人仔一共十一胎！(亻厓)老妹係滿子，到小學六年生還捉等阿姆个乳頭入睡个！(亻厓)就無份了。
過去个客家婦人家肩頭扛起畜家一片天，無閒直掣；在外人面前照常貶衫飼乳，全無禁無忌，根本無時間驚見笑。客家阿姆个愛係偉大个！
