吉林茶園
文、圖∕薛常威
國立中央大學客家語文暨社會科學學系在職專班碩士
薛常威 聲檔 — 吉林茶園（四縣腔）
茶葉算將係摎台灣客家人當相干个產業，自大陸徙到台灣該下，北台灣就盡多客家人種茶、賣茶。背尾日本時代又有兜西部客家人徙到東部个花蓮摎台東，東部个客家人當多種西瓜，乜有人種茶。
「吉林茶園」就係東部客家人開个茶園，自1923年開始傳了四代人，2009年分還鄉个彭瑋翔接下家業。吉林茶園在瑞穗舞鶴，這位个風光、地理環境盡好，好山好水，當有特色个作物係柚仔摎茶葉。佢兜毋驚辛苦，用手工摘「一心兩葉」，用天然个肥料，無用化學藥仔，堅持用自然个耕種農法，摎環境共下共好，並且緊改良特殊个蜜香紅茶，摎實驗个精神，做出風味特殊个茶。柚花茶、舞桔茶，全部當有名，得過當多項大獎。
用客家人勤儉、打拚个硬頸精神來做好茶，係吉林茶園無變个堅持。保有客家傳統文化，摻等花蓮阿美族个熱情，表現出結合人文摎茶文化个吉林茶園个美感。
第四代頭家彭瑋翔，用後生人个想法，將茶園摎茶廠完美結合，營造特別个啉茶空間，分每一個人客，做得看清楚工作人員做茶个樣仔，透過招待人客啉茶个過程，講故事，恁樣形輕鬆隨意个招待，分人還較想多停留一下，也建立起自家个品牌形象。
這幾年，吉林茶園乜有提供採茶體驗，用人導覽个方式，帶大家欣賞茶園風光，參訪做茶个過程，經由DIY个活動，了解在地特色，分每一個人客留下難忘个回憶。
最近一擺个活動係在瑞穗青蓮寺舉辦个「2020夏舞茶」，國語係下午茶，客家話就係下晝茶。歡迎大小朋友闔家過去行尞，啉茶，啉咖啡。
「吉林茶園」講个係四代客家人適應環境个能力，種茶賣茶係客家人个好本事。客家人在台灣西部做得摎學老人相處，徙到東部乜做得摎原住民和平相處，用自家个本事安身立業
